विश्व स्वास्थ्य संगठन (डब्ल्यूएचओ) ले तातो लहरका कारण युरोपमा १ हजार ३०० जनाभन्दा बढीको मृत्यु भएको जनाएको छ। डब्ल्यूएचओका महानिर्देशक टेड्रोस अधानोम गेब्रेयससले गर्मीका कारण हुने शारीरिक तनावलाई ‘मौन हत्यारा’ भनेर उल्लेख गरेका छन्। युरोप पृथ्वीको सबैभन्दा तीव्र रूपमा तातिरहेको महादेश भएकाले त्यहाँ तापक्रम विश्वव्यापी औसतभन्दा दोगुना तीव्र गतिमा बढिरहेको छ। १५ असार, काठमाडौं।
डब्ल्यूएचओले २१ जुनदेखि युरोपमा उच्च तापक्रमसँग सम्बन्धित १ हजार ३०० भन्दा बढी अतिरिक्त मृत्यु दर्ता भएको जानकारी दिएको छ। गर्मीयामको सुरुमा आएको अभूतपूर्व तातो लहरका कारण जनजीवनमा असर परेको छ। आइतबार पनि युरोपका विभिन्न देशहरूमा तापक्रमका नयाँ रेकर्डहरू कायम भएका छन्। जर्मनी, पोल्यान्ड र चेक गणतन्त्रमा तापक्रमले नयाँ कीर्तिमान बनाएको र भीषण गर्मीको लहर पूर्वी युरोप तर्फ फैलिँदै गएको छ।
गेब्रेयससले गर्मीका कारण हुने शारीरिक तनावलाई प्रायः ‘मौन हत्यारा’ भनेर चिन्ने उल्लेख गर्दै, युरोपका घर, कार्यालय तथा विद्यालय यस्ता चरम तापक्रम सामना गर्न तयार नभएको बताएका छन्। टेड्रोसका अनुसार युरोपमा तापक्रम वृद्धि विश्वव्यापी औसतको तुलनामा करिब दुई गुणा तीव्र गतिमा भइरहेको छ। फ्रान्सको राष्ट्रिय स्वास्थ्य मन्त्रालयले बुधबारदेखि अहिलेसम्म देशभर अपेक्षाभन्दा करिब १ हजार बढी मृत्यु भएको जानकारी दिएको छ। त्यस अतिरिक्त मृत्युमध्ये अधिकांश ६५ वर्ष वा सोभन्दा माथिका उमेर समूहका छन्। घरमै हुने मृत्युको संख्या पनि करिब ४० प्रतिशतले वृद्धि भएको मन्त्रालयले उल्लेख गरेको छ।
