१७ असार, काठमाडौं । इरान र अमेरिकाबीच कतारको राजधानी दोहामा बुधबार वार्ता जारी रहेको छ । अन्तर्राष्ट्रिय सञ्चार संस्था रोयटर्सको एक रिपोर्टले यसलाई प्रत्यक्ष वार्ता नभई ‘टेक्निकल डायलग’ भनिएको छ । यो वार्ताको मध्यस्थता पाकिस्तान र कतारले गरिरहेको बताइएको छ । वार्ताको तयारीका लागि मंगलबार मात्रै अमेरिकी विशेष दूत स्टीव बिटकफ र राष्ट्रपति डोनाल्ड ट्रम्पका ज्वाइँ जरेड कुसनर कतार पुगेका थिए । उनीहरूले कतारका प्रधानमन्त्रीसँग समेत भेटवार्ता गरेका थिए । तथापि, बुधबारको वार्तामा उनीहरू सहभागी नभएको जानकारी दिइएको छ ।
यस वार्ता स्ट्रेट अफ होर्मुजमा हालै भएको सैन्य तनावपछि विशेष महत्व बोकेको छ । यसअघि १७ जुनमा अमेरिका र इरानबीच १४ बुँदे मेमोरेन्डम अफ अन्डरस्ट्यान्डिङ(एमओयू)मा सहमति भएको थियो । त्यसपछि २१ जुनमा स्विट्जरल्यान्डमा दुई देशका प्रतिनिधिमण्डलबीच पहिलो चरणको शान्ति वार्ता सम्पन्न भएको थियो । युद्ध रोकिएको केही समयपछि होर्मुज स्ट्रेटमा भएको तनावले पुनः द्वन्द्व भड्किन सक्ने आशंका बढाएको छ । उक्त घटनालाई लिएर दुवै देशले एकअर्कामाथि युद्धविराम उल्लंघन गरेको आरोप लगाउँदै आएका छन् ।
