१५ असोज, बुटवल । विभागीय टोली नेपाल पुलिस क्लब, खैरा भलिबल क्लब पञ्जाब र सभापोखरी भलिबल क्लब दोस्रो मदन भण्डारी कप अन्तर्राष्ट्रिय आमन्त्रित रनिङ शिल्ड पुरुष भलिबल प्रतियोगिताको सेमिफाइनलमा प्रवेश गरेका छन्। बुटवल अन्तर्राष्ट्रिय सम्मेलन केन्द्रमा बुधबार समूह ‘ए’ अन्तर्गत भएको अन्तिम खेलमा पुलिसले मणिमुकुन्द भलिबल क्लबलाई ३–२ सेटमा पराजित गर्दै अन्तिम चारमा स्थान पक्का गरेको हो। पुलिसले मणिमुकुन्दलाई २५–२०, २३–२५, २५–२०, १८–२५, १५–१२ को कठिन लडाइँमा हराएको छ। लगातार तेश्रो जित निकाल्दै पुलिस समूह विजेता बन्न सफल भयो। त्यसै समूहबाट खैरा भलिबल क्लब पञ्जाब उपविजेताको रूपमा सेमिफाइनलमा पुगेको छ। खैरा ३–१ को सेटमा श्रीलंका पुलिस क्लबलाई हराएको हो। खैराले २५–२०, २५–२०, १९–२५, २५–१७ को बलियो प्रदर्शन गरेको थियो। हारपछि मणिमुकुन्द र श्रीलंका पुलिस प्रतियोगिताबाट बाहिरिएका छन्।
समूह ‘बी’ मा सभापोखरी भलिबल क्लबले लगातार दोस्रो जित निकाल्दै सेमिफाइनल यात्रा सुनिश्चित गरेको छ। अधिकांश भारतीय खेलाडीहरूले सुसज्जित सभापोखरीले एपीएफ क्लबलाई ३–१ सेटमा हरायो। सभापोखरीले क्रमशः २४–२६, २५–१९, २५–२०, २०–११ को सेटमा विजय हासिल गरेको थियो। बिहीबारको अन्तिम खेल फ्लडलाइट अभावका कारण अधुरा रह्यो। एपीएफ र गुजरात स्पोर्टिङ क्लबको लिग चरण अन्तिम खेल १–१ सेट बराबरी भएपछि सहमतिमा स्थगित गरिएको हो। दुवै टोलीले बाँकी खेल शुक्रबार सम्पन्न गर्ने सहमति जनाएका छन्। त्यसपछि मात्र अर्को सेमिफाइनल टोलीको निर्धारण हुनेछ। सेमिफाइनलका खेलहरू पनि शुक्रबार नै हुनेछन्। मदन भण्डारी स्पोर्ट्स एकेडेमीले आयोजना गरेको यस प्रतियोगितामा नेपालका चार र विदेशी तीन गरी जम्मा सात टोली सहभागी छन्। असोज १७ गतेसम्म सञ्चालन हुने प्रतियोगिताको विजेताले रनिङ शिल्डसहित रु ७ लाख पुरस्कार प्राप्त गर्नेछन् भने उपविजेताले रु ३ लाख ५० हजार प्राप्त गर्नेछन्। तेस्रो हुने टोलीले रु १ लाख ७५ हजार पुरस्कार र सान्त्वना पुरस्कारका रूपमा रु ७५ हजार पाउनेछन्। कप, मेडल र प्रमाणपत्र पनि प्रदान गरिनेछ—आयोजक एकेडेमीका अध्यक्ष ध्रुव आचार्यले जानकारी दिए। प्रतियोगिताको उत्कृष्ट खेलाडीले रु १५ हजार पुरस्कार पाउनेछन् भने उत्कृष्ट स्पाइकर, सेटर, सर्भर, ब्लकर, डिफेन्डर र उत्कृष्ट प्रशिक्षकले हरेकले रु ८ हजार रुपैयाँ पुरस्कार प्राप्त गर्नेछन्।
