१८ असार, काठमाडौँ । राष्ट्रिय खेलकुद परिषद् (राखेप) का सदस्यसचिव रामचरित्र मेहता र नेपाल ओलम्पिक कमिटी (एनओसी) का अध्यक्ष जीवनराम श्रेष्ठले २० औं एसियन गेम्स (एसियाड) मा नेपाली खेलाडीहरूको सहभागिता विवादरहित हुने र उनीहरूले दबावबिना खेल्ने विश्वास व्यक्त गरेका छन्। नेपाल खेलकुद पत्रकार मञ्च (एनएसजेफ) ले बिहीबार विश्व खेलकुद पत्रकार दिवसको अवसरमा आयोजना गरेको संवाद कार्यक्रममा दुबैले मिलेर विवादरहित सहभागिताका लागि सहज पहल भइरहेको बताएका छन्। सदस्य सचिव मेहताले भने, “केही विवादहरू छन्, तर ती हामीले बोरामा सिलाएर राखेका छौं। अब एसियाली खेलकुदमा कुनै विवाद हुँदैन। उनीहरू चाँडै नै वैदेशिक प्रशिक्षणमा जानेछन् र केवल पदकमा केन्द्रित हुनेछन्।”
अघिल्लो समयमा राखेप र एनओसी बीचको विवादले ठूला प्रतियोगितालाई असर पार्थ्यो र खेलाडीहरू कमजोर मानसिकतासँग ती प्रतियोगितामा उत्रिनुपर्ने हुन्थ्यो। यसपालि त्यस्तो अवस्था पूर्ण रूपमा हटेको छ, जुन दुई मुख्य निकायका प्रमुखहरूले घोषणा गरेका छन्। सदस्य सचिव मेहता र अध्यक्ष श्रेष्ठले नेपाली खेलकुदको दीर्घकालीन समाधानका लागि राष्ट्रिय खेलकुद विकास ऐन २०७७ को संशोधन आवश्यक रहेको पनि बताएका छन्। मेहताले चाँडै नै ऐन संशोधन प्रक्रिया अघि बढ्ने बताए।
“समस्या छ। त्यसको समाधानका लागि ऐन संशोधन वा नयाँ ऐन बनाउनै पर्छ। तयारी भइरहेको छ,” उनले भने। यस्तै, नेपाल ओलम्पिक कमिटीका अध्यक्ष श्रेष्ठले भने, ऐन मात्र होइन, नियमावली पनि संशोधित हुन आवश्यक रहेको बताए। उनले भने, “यहाँ व्यक्तिको स्वार्थअनुसार नियमावली परिवर्तन हुने गरेको छ। त्यसमा विशेष ध्यान दिन जरुरी छ।”
सदस्य सचिव मेहताका अनुसार, यस वर्ष एसियाली खेलकुदमा नेपालले २३ खेलमा १४० जनाले सहभागिता जनाउनेछ। सरकारले एसियाली खेलकुद तयारीका लागि दुई करोड ८० लाख रुपैयाँ बजेट विनियोजन गरेको र सहभागिताका लागि थप ११ करोड २० लाख छुट्याइएको उनले बताए। स्वर्ण पदकसहित दोहरो अंकमा पदक जित्ने सरकारको लक्ष्य पुरा गर्न आफूहरू लागि परेको र आगामी महिनादेखि खेलाडीहरूलाई वैदेशिक प्रशिक्षणमा पठाउने तयारी भइरहेको उनले बताए।
नेपाल खेलकुद पत्रकार मञ्चका अध्यक्ष निरञ्जन अधिकारीले एआइपिएसको स्थापना भएको १०० वर्षअघि आजकै दिन, जुलाई २ लाई विश्व खेलकुद पत्रकार दिवसको रूपमा मनाउने परम्परा रहेको जानकारी दिए। एआइपिएसको शाखा विश्वभरिकै फैलिएको र नेपालको एनएसजेएफ पनि नयाँ एआइपिएसको आधिकारिक संस्था रहेको उनले बताए।
