नेपाली गल्फर सुवास तामाङ र शुक्रबहादुर राई भारतको कोलकातामा आयोजना हुने कोएल इन्डियन ओपन गल्फ प्रतियोगितामा प्रतिस्पर्धा गर्न लागेका छन्। यो प्रतियोगिता अगष्ट ११ देखि १४ सम्म सञ्चालन हुनेछ र यसको कुल पुरस्कार राशि १ करोड भारतीय रुपैयाँ तोकिएको छ। प्रतियोगितामा नेपालसहित विभिन्न देशका १३० जना गल्फर सहभागी हुने भएका छन्।
सुवास र शुक्र दुवै गल्फरले डीपी वर्ल्ड प्रोफेसनल गल्फ टूर अफ इन्डिया (पीजीटीआई) अन्तर्गत सञ्चालन हुने यस प्रतियोगितामा भाग लिनेछन्। ७२ होलको यो प्रतियोगिता कोलकातामा टोलीगन्ज खेल मैदानमा हुनेछ। यस्तै, सुवास सेप्टेम्बर-अक्टोबर महिनामा जापानमा हुने २० औं एसियन गेम्समा पनि सहभागिता जनाउने तयारीमा छन्। गत साता सुवास भारतको श्रीनगरमा भएको जे एण्ड के ओपन गल्फमा एक स्ट्रोकले कट बनाउनबाट वञ्चित भएका थिए।
