इप्पानले १६ हजार मेगावाट विद्युत् खरिद सम्झौताका लागि प्रक्रिया तत्काल खुला गर्न माग गर्यो
स्वतन्त्र ऊर्जा उत्पादकहरूको संस्था इप्पानले १६ हजार मेगावाट क्षमताका जलविद्युत आयोजना रोकिएको विद्युत् खरिद सम्झौता प्रक्रिया तत्काल खुला गर्न नेपाल विद्युत् प्राधिकरणसँग माग गरेको छ। नेपाल विद्युत् प्राधिकरणका कामु कार्यकारी निर्देशक दीर्घायूकुमार श्रेष्ठले साना आयोजनाहरूको पीपीए प्रक्रिया र आरसीओडी थपसम्बन्धी कार्य अघि बढाइएको जानकारी दिएका छन्। निजी ऊर्जा उत्पादकहरूले प्रसारण लाइनमा ढिलाइ, पीपीए दर पुनरावलोकन र संयुक्त संयन्त्र गठनसहितका १३ बुँदे माग प्राधिकरणलाई प्रस्तुत गरेका छन्। २५ साउन, काठमाडौं।
इप्पानले आवेदन दिएका १६ हजार मेगावाट बराबरका आयोजनाहरूको विद्युत् खरिद सम्झौता (पीपीए) प्रक्रिया तत्काल खुला गर्न नेपाल विद्युत् प्राधिकरणलाई अनुरोध गरेको हो। प्राधिकरण र इप्पानका प्रतिनिधिहरूबीच भएको भेटवार्तामा इप्पानले लामो समयदेखि रोकिएको पीपीए प्रक्रिया अघि बढाउन आग्रह गरेको छ। इप्पान अध्यक्ष मोहनकुमार डाँगीले पीपीए रोकिएसँगै अध्ययन तथा निर्माणको चरणमा रहेका आयोजनाहरूको लगानी, वित्तीय व्यवस्थापन र आयोजना विकासमा असर पुगेको बताए। ‘लामो समयदेखि पीपीए हुन नसकेका आयोजनाहरूको समस्या तत्काल समाधानका लागि १६ हजार मेगावाटको सीमा खुला गरेर सबै योग्य आयोजनाहरूको पीपीए प्रक्रिया अघि बढाउनुपर्छ,’ डाँगीले भने।
प्राधिकरणका कामु कार्यकारी निर्देशक दीर्घायूकुमार श्रेष्ठले भने १० मेगावाटभन्दा कम क्षमताका जलविद्युत आयोजनाहरूको पीपीए प्रक्रिया अघि बढिसकेको जानकारी गराए। इप्पान प्रतिनिधिमण्डलसँगको भेटमा उनले साना आयोजनाहरूको पीपीए प्रक्रिया अघि बढाउने तयारी भइरहेको बताए। साथै, व्यावसायिक उत्पादन सुरु गर्ने मिति (आरसीओडी) थपका लागि पनि प्राधिकरणले प्रक्रिया अघि बढाएको श्रेष्ठले जानकारी दिए। आयोजनाको अवस्था र समस्याको प्रकृतिको आधारमा ‘ए’ र ‘बी’ समूह बनाएर आरसीओडी थपसम्बन्धी काम सुरु गरिएको उनले बताए।
