दोस्रो पटक कप्तानको जिम्मेवारी पाएका सन्दीप लामिछानेसँग अहिले ओडीआई मान्यता कायम राख्ने चुनौती छ। नेपाल क्रिकेट संघ (क्यान)ले रोहित पौडेललाई हटाउँदै सन्दीपलाई राष्ट्रिय टोलीको ओडीआई कप्तान नियुक्त गरेको छ। सन्दीप लामिछानेले अगस्ट ३० देखि मलेसियामा सुरु हुने एसीसी प्रिमियर कपबाट टोलीको नेतृत्व सम्हाल्नेछन्। खराब प्रदर्शनका कारण ओडीआई मान्यता जोगाउने चुनौतीका बीच सन्दीपले चार वर्षपछि पुनः कप्तानीको जिम्मेवारी पाएका हुन्। २६ साउन, काठमाडौं। निरन्तर खराब प्रदर्शनका कारण नेपालको एकदिवसीय अन्तर्राष्ट्रिय क्रिकेट (ओडीआई) मान्यता संकटमा छ। आगामी केही खेलमा राम्रो प्रदर्शन गर्न नसके नेपालले ८ वर्षअघि प्राप्त गरेको ओडीआई मान्यता गुमाउने जोखिम छ। यही संकटमा नेपाली क्रिकेट सम्हाल्ने दायित्व सन्दीप लामिछानेको काँधमा आएको छ।
सन्दीप लामिछानेले चार वर्षपछि पुनः कप्तान बनेका हुन्। उनले २०७८ मा राष्ट्रिय टोलीको नेतृत्व गर्ने अवसर पाएका थिए, तर बलात्कार मुद्दाले एक वर्ष नपुग्दै उनको कप्तानी समाप्त भयो। क्यानले २९ मंसिर २०७८ मा ज्ञानेन्द्र मल्ललाई हटाएर सन्दीपलाई जिम्मेवारी दिएको थियो। आईसीसी विश्वकप लिग–२ साइकल अन्तर्गत अन्तिम सिरिज पनि सन्दीपकै कप्तानीमा खेलिनेछ। नेपालले लिग–२, २०१९–२०२३ साइकलका पछिल्ला १२ मध्ये ११ खेल जितेर शीर्ष चारमा रहि सिधै विश्वकप छनोटमा स्थान पाएको थियो। तर यसपटक बाँकी चार खेल जित्दा पनि शीर्ष चारमा पर्न सम्भावना न्यून छ।
सन्दीपले २१ वर्षको उमेरमा पहिलोपटक राष्ट्रिय टोलीको कप्तानी सम्हालेका थिए। उनले १४ ओडीआई खेल खेलेका छन्, जसमा ४ जित, ९ पराजय र एक बराबरी थियो। २१ भदौ २०७९ मा एक युवतीको बलात्कार उजुरीपछि क्यानले उनलाई कप्तान र राष्ट्रिय टोलीबाट निलम्बन गरेको थियो। २७ पुस २०७९ मा उच्च अदालत पाटनले धरौटीमा छोड्न आदेश दिएपछि निलम्बन हटाइयो। सन्दीप नेपालबाट ओडीआई र टी२० दुवैमा १०० विकेट लिने पहिलो बलर हुन्। उनले ओडीआईमा सबैभन्दा छिटो १०० र १५० विकेट लिने विश्वकीर्तिमान समेत राखेका छन्।
