मदन भण्डारी स्पोर्टस एकेडेमीले आगामी असोज १२ देखि १७ गतेसम्म बुटवलमा अन्तर्राष्ट्रिय पुरुष भलिबल प्रतियोगिता आयोजना गर्ने निर्णय गरेको छ। बुटवल मण्डपमा आयोजना हुने उक्त प्रतियोगितामा नेपाल, भारत, चीन, पाकिस्तान, श्रीलङ्का र बङ्गलादेशका टोलीहरू सहभागिता जनाउने एकेडेमीका अध्यक्ष ध्रुव आचार्यले जानकारी दिए। प्रतियोगिताको विजेतालाई ७ लाख रुपैयाँसहित पदक र प्रमाणपत्र प्रदान गरिनेछ भने यसको कुल खर्च १ करोड १८ लाख रुपैयाँ अनुमान गरिएको छ। २७ साउन, बुटवल।
बुटवलमा अन्तर्राष्ट्रिय आमन्त्रण प्राप्त पुरुष भलिबल प्रतियोगिता आयोजना गरिने भएको छ। साउन २५–२६ गते मदन भण्डारी स्पोर्टस एकेडेमीको बुटवलमा बसेको ११औं पूर्ण बैठकले मदन भण्डारी कप अन्तर्राष्ट्रिय आमन्त्रित रनिङसिल्ड पुरुष भलिबल प्रतियोगिता–२०८३ गर्ने निर्णय गरेको क्लबले जनाएको छ। उक्त प्रतियोगिता आगामी असोज १२ देखि १७ गतेसम्म सञ्चालन हुने जानकारी दिइएको छ। बुटवल मण्डपमा हुने प्रतियोगितामा नेपालका ३ टिमसहित भारत, चीन, पाकिस्तान, श्रीलङ्का र बङ्गलादेशबाट टोलीहरू सहभागी हुने निर्णय गरेपछि तयारी अगाडि बढाइएको एकेडेमीका अध्यक्ष ध्रुव आचार्यले बताए।
‘नेपालमै पहिलो पटक यस स्तरको उच्चस्तरीय भलिबल प्रतियोगिता आयोजना हुन लागेको छ’, उनले दाबी गरे। यसअघि क्लबले इन्डो–नेपाल भलिबल प्रतियोगिता सम्पन्न गरिसकेको छ। यस पटक थप परिष्कृत गर्दै प्रतियोगिताको दोस्रो संस्करणलाई अन्तर्राष्ट्रिय स्तरको बनाउन लागिएको बताए। प्रतियोगिताको विजेतालाई नगद ७ लाख रुपैयाँ, कप, मेडल र प्रमाणपत्रबाट सम्मान गरिनेछ। प्रतियोगितामा दोस्रो हुने टोलीलाई ३ लाख ५० हजार, तेस्रो हुने टोलीलाई १ लाख ७५ हजार रुपैयाँ, कप, मेडल र प्रमाणपत्र प्रदान गरिनेछ।
त्यसैगरी, सान्त्वना टिमलाई ७५ हजार रुपैयाँ प्रदान गरिनेछ भने विधागत रूपमा प्लेयर अफ दि म्याचलाई १ लाख, सर्वोत्कृष्ट खेलाडीलाई नगद १५ हजार रुपैयाँ पुरस्कार दिइनेछ। उत्कृष्ट स्पाइकर, सेटर, सर्वर, कोच, बल्कर र डिफेन्स खेलाडीहरूलाई क्रमशः ८ हजार रुपैयाँ, कप तथा मेडलबाट सम्मान गरिनेछ। करिब १२८ जना खेलाडी र १५० जना अधिकारीहरू सहभागी हुने बताइए पनि प्रतियोगिताको कुल खर्च १ करोड १८ लाख रुपैयाँ हुने अनुमान आयोजकहरूले गरेका छन्।
बैठकबाट एकेडेमीका प्रदेश संरचनाहरूलाई प्रभावकारी तथा सक्रिय बनाउने निर्णय गर्दै केन्द्रीय समितिमा पनि फेरबदल गरिएको एकेडेमी अध्यक्ष ध्रुव आचार्यले जानकारी दिए। वरिष्ठ उपाध्यक्षमा मोहन रेग्मी, उपाध्यक्षमा झकबहादुर मिदुन, महासचिवमा मदन उप्रेती, उपमहासचिवमा चन्द्र बदना राई नियुक्त भएका छन्। साथै, रामबहादुर केसी, सचिव उदय अर्याल, निलम बज्राचार्य, विनोद आचार्य, नन्दु काउचा र कोषाध्यक्ष कमल ढकाललाई पनि जिम्मेवारी दिइएको छ। सदस्यहरूमा रुपन्देहीकी सिरिशा कार्की, सुदूरपश्चिमकी अमरावती राना, राजीव राना, शिवराज राना, गण्डकीका ऋषिराम गौतम, अनन्त श्रेष्ठ र मधेश प्रदेशका राजेश महतो पनि रहेका छन्। कोशी प्रदेश संयोजकमा उदयकुमार अर्याल, मधेश प्रदेश अध्यक्षमा रविन्द्रराज भण्डारी, बागमती प्रदेशमा रामबहादुर केसी, लुम्बिनी प्रदेश संयोजकमा बुद्धि बस्याल, गण्डकी प्रदेश अध्यक्षमा गिरमान गुरुङ, कर्णाली प्रदेश अध्यक्षमा गोपाल बहादुर शाही र सुदूरपश्चिम प्रदेश संयोजकमा ज्ञानुराज दगौरा नियुक्त गरिएको एकेडेमी अध्यक्षले बताए।
