आमिर अख्तर र नदिम शाहिद इटालीमा टी–१० फ्रेन्चाइज लिग सञ्चालन गर्दै, ६ टोली सहभागी हुने
नेपालका पूर्व क्रिकेटर आमिर अख्तर र इंग्ल्यान्डका नदिम शाहिदले इटालीमा सिटी-आधारित फ्रेन्चाइज टी–१० क्रिकेट लिग आयोजना गर्न लागेका छन्। इटालियन क्रिकेट फेडेरेसनको समर्थनमा आगामी नोभेम्बर ७ देखि १५ सम्म रोममा ६ फ्रेन्चाइज टोलीबीच प्रतिस्पर्धा हुनेछ। एपेक्स टी–१० लिमिटेडमार्फत सञ्चालन हुने यस लिगले एसोसिएट राष्ट्रहरूमा क्रिकेटको विकास र नयाँ दर्शकसमक्ष खेल पुर्याउने लक्ष्य राखेको छ। २ भदौ, काठमाडौं।
आमिर अख्तर र नदिम शाहिदले इटालीमा सिटी-आधारित फ्रेन्चाइज टी–१० क्रिकेट लिग सञ्चालन गर्ने भएका छन्। इटालियन क्रिकेट फेडेरेसनको आधिकारिक समर्थनमा ‘इटालिया टी–१० क्रिकेट’ को पहिलो संस्करण आगामी नोभेम्बर ७ देखि १५ सम्म रोममा आयोजना गरिँदैछ। प्रतियोगितामा ६ सिटी-आधारित फ्रेन्चाइज टोलीले प्रतिस्पर्धा गर्नेछन्। यो लिग एपेक्स टी–१० लिमिटेडमार्फत सञ्चालित हुनेछ।
अख्तर र शाहिदले स्थापना गरेको यस कम्पनीले एसोसिएट राष्ट्रहरूमा टी–१० फ्रेन्चाइज प्रतियोगितामार्फत क्रिकेटको विकास गर्ने उद्देश्य राखेको छ। १० ओभरको खेल करिब ९० मिनेटमा सम्पन्न हुने भएकाले टी–१० ढाँचा नयाँ दर्शकसम्म क्रिकेट पुर्याउने एक महत्वपूर्ण माध्यमका रूपमा विकास गर्ने योजना रहेको आयोजकले जनाएको छ। प्रतियोगिताका खेलहरू ३० भन्दा बढी देशमा प्रत्यक्ष प्रसारण गरिनेछन्।
नदिम शाहिद एपेक्स टी–१० का सहसंस्थापक र प्रमुख कार्यकारी अधिकृत हुन्। उनले इंग्ल्यान्डमा दुई दशकभन्दा बढी प्रथम श्रेणी क्रिकेट खेलेका थिए र इंग्ल्यान्ड ‘ए’ टोलीबाट पनि प्रतिनिधित्व गरेका थिए। आमिर अख्तर नेपालका पूर्व अन्तर्राष्ट्रिय क्रिकेटर हुन्। उनले नेपालमा एभरेस्ट प्रिमियर लिग स्थापना गरी फ्रेन्चाइज क्रिकेट विकासमा महत्वपूर्ण योगदान पुर्याएका थिए। इटालीमा पनि त्यही अनुभव प्रयोग गरेर स्थानीय खेलाडी विकास र घरेलु क्रिकेटको स्तर उकास्ने लक्ष्य राखिएको छ। इटालियन क्रिकेट फेडेरेसनले यस लिगलाई आधिकारिक समर्थन दिँदै आईसीसीको स्वीकृति प्रक्रियाका लागि समन्वय गर्ने जनाएको छ। क्रिकेट सन् २०२८ को लस एन्जलस ओलम्पिकमा फर्किंदै गर्दा इटालीमा सुरु हुन लागेको यो फ्रेन्चाइज लिगलाई त्यहाँ क्रिकेट विस्तारका लागि महत्वपूर्ण कदमका रूपमा हेरिएको छ।
