भोटेकोशी त्रिशूलीमा आएको विनाशकारी बाढीका कारण केहि समय बन्द भएका विद्यालयहरू पुनः खुल्न थालेका छन्। बाढीबाट प्रभावित विद्यार्थीहरूले राहत महसुस गरेका छन्। विद्यालयका अधिकारीहरूले विद्यालय सञ्चालन पुनः सुरु गरी विद्यार्थीहरूलाई सामान्य अवस्थामा फर्काउने उद्देश्यले पाठ्यक्रम बाहेकका अन्य क्रियाकलापहरूमा जोड दिइरहेका छन्।
विनाशकारी बाढीले नुवाकोट जिल्लामा ६ वटा विद्यालय पूर्ण रूपमा क्षतिग्रस्त भएका र ३ वटा विद्यालयमा आंशिक क्षति पुगेको जिल्ला प्रशासन कार्यालय नुवाकोटले सार्वजनिक गरेको विवरणमा उल्लेख छ। विदुर नगरपालिका देविघाटस्थित सहिद जगत् प्रकाश जङ्ग शाह संस्कृत माध्यमिक विद्यालय असोज १ गतेदेखि पुनः सञ्चालनमा आएको छ। प्रधानाध्यापक मञ्जु चित्रकारका अनुसार विद्यार्थीहरूका लागि विभिन्न खेलकुद र मनोपरामर्शात्मक कार्यक्रमहरू सञ्चालन भइरहेको छ।
त्रिशूली खोला नजिकै रहेको यो विद्यालयमा करिब ८ सय जना विद्यार्थीहरू अध्ययनरत छन्। प्रधानाध्यापक चित्रकारले बताइन् कि विद्यालयमा प्रि-स्कूलदेखि कक्षा १० सम्म पठनपाठन हुन्छ र कक्षा ६ देखि १० सम्म संस्कृत पनि पढाइन्छ। उनले भनिन्, “विद्यालय खुला भएको पहिलो दिन कतिपय विद्यार्थीहरू बाटो र पुलको अभाव वा डरका कारण उपस्थित हुन सकेनन्। अहिले विभिन्न गतिविधिहरू गरेर विद्यार्थीहरूको मनोबल उकास्न ध्यान दिइरहेका छौं।” बाढीले घर बगाएपछि होल्डिङ सेन्टर र आफन्तकोमा बस्दै आएका विद्यार्थी विराज चित्रकारले विद्यालय खुलेपछि समय बिताउन सहज भएको र शिक्षक तथा साथीहरूसँग कुराकानीले पहिलाभन्दा डर कम भएको बताए।
बाढी आएको दिन फुटसल खेल्न गएका बेला विद्यालयको पोसाक र किताबहरू बाढीले बगाएको बताउने विराजलाई खोला नजिकै भएको कारण अर्को ठूलो बाढीले फेरि विद्यालय बगाउने कि भन्ने डर छ। उनले भने, “बाढीपछि विद्यालय बन्द हुँदा धेरै कठिनाइ भएको थियो। साथीहरूसँग भेट नहुँदा निकै मन खिन्न हुन्थ्यो। साथीहरूसँग भेटेर कुरा गर्दा मन हल्का भयो।” बाढीले आफ्नो जन्मघर र बाल्यकालका धेरै स्मृतिहरू बगराएको छात्रा प्रकृति चित्रकारले बताइन्। उनले भनिन्, “विद्यालय आउँदा दुःख बिर्सिन्छ, तर विद्यालय छोडेर घर जाने बेला थाहा हुन्छ कि मेरो घर त बाढीले बगेको छ। मन फेरि धेरै दुख्छ।” अभिभावक रञ्जना श्रेष्ठले विद्यालय खुल्दा राहत महसुस भएको बताउँदै, “बालबालिकामा डर र चिन्ताको समस्या रहेको छ।” जानकारहरूले भनेका छन् कि लामो समयपछि विद्यालय आउँदा केही राहत महसुस भए पनि बालबालिकामा बाढीको मानसिक आघात अझै गहिरो रहेको र पुनः सामान्य अवस्थामा फर्कन केही समय लाग्नेछ।
