२२ असोज, काठमाडौं । अर्जेन्टिनाका स्टार फुटबलर लियोनल मेसीले राष्ट्रिय टोलीबाट आफ्नो अन्तिम खेल खेलिसकेपछि भावुक सन्देश दिएका छन्। उनले अर्जेन्टिनाको प्रतिष्ठित निलो र सेतो जर्सी लगाउने पलहरूले अहिले नै आफ्नो मनमा गहिरो छाप छाड्न थालेको बताएका छन्। मेसीले सामाजिक सञ्जालमार्फत आफ्नो अन्तर्राष्ट्रिय फुटबल यात्रालाई सम्झिँदै आफूले सही निर्णय लिएकोमा पूर्ण विश्वस्त रहेको बताएका छन्। उनले अर्जेन्टिनाको जर्सीमा बिताएको समयलाई खुसी र केही दुःख मिश्रित अविस्मरणीय अनुभवको रूपमा वर्णन गरेका छन्।
‘हिजो मेरो अन्तिम खेल थियो र मैले निलो र सेतो जर्सी लगाउने ती क्षणहरू पहिले नै सम्झन थालेको छु। मलाई थाहा छ मैले आफ्नो निर्णय ठीकै लिएको छु। यो यात्रा खुसी र दुःखले भरिएको अविश्वसनीय कथा हो। तर मैले हरेक कदम सार्थक बनाएँ भन्ने कुरामा म पूर्ण रूपमा स्पष्ट छु,’ मेसीले भने। उनले आफ्नो यात्रामा परिवारले दिएका समर्थनलाई सबैभन्दा महत्वपूर्ण ठान्छन्। विशेष गरी कठिन समयहरूमा परिवारले निरन्तर साथ दिएकोमा मेसीले गहिरो कृतज्ञता व्यक्त गरेका छन्। साथ साथै, साथीहरू, सँगै खेलिएका खेलाडीहरू, प्रशिक्षकहरू र प्राविधिक टोलीलाई धन्यवाद दिएका छन्।
मेसीले अर्जेन्टिनाका महान् खेलाडी डिएगो म्याराडोनालाई पनि सम्झिएका छन्। उनले म्याराडोनाको योगदानले अर्जेन्टिनालाई योग्य स्थानमा पुर्याएको भन्दै आफ्नो यात्रामा हरेक पाइलामा म्याराडोनाको उपस्थिति महसुस भएको बताएका छन्। ‘डिएगोले हाम्रो देशलाई ठिक ठाउँमा पुर्याए। मैले सधैं भन्ठानेको छु, उनी हामीसँग यहाँ हुँदा र स्वर्गबाट पनि हाम्रा हरेक कदममा साथ दिइरहन्छन्,’ मेसीले लेखेका छन्। राष्ट्रिय टोलीको लागि खेल्न अनुमति र समर्थन गर्ने क्लबहरूलाई पनि धन्यवाद व्यक्त गरेका छन्।
राष्ट्रिय टोलीको जर्सी लगाउँदा देशका लागि समर्पित हुन क्लबहरूले दिएको स्वतन्त्रता आफूका लागि अत्यन्त महत्त्वपूर्ण रहेको उनको भनाइ छ। मेसीले आफ्नो सफल यात्राका लागि भगवानप्रति पनि आभार व्यक्त गरेका छन्। ‘म आभारी छु। म तपाईंहरू सबैलाई धेरै माया गर्छु, सँधै तपाईंहरूलाई सम्झिरहनेछु र कृतज्ञ नै रहनेछु,’ उनले लेखेका छन्।
