नेपाल राष्ट्र बैंकले विद्युतीय वालेट प्रयोगकर्ताका लागि राष्ट्रिय परिचयपत्र अनिवार्य गरेको छ। भुक्तानी सेवा प्रदायकले २०७८ असोज मसान्तभित्र प्रयोगकर्ताको राष्ट्रिय परिचयपत्र विवरण अद्यावधिक गर्ने व्यवस्था मिलाउनुपर्नेछ। विदेशमा बस्ने नेपाली र अशक्त नागरिकका लागि केन्द्रीय बैंकले विशेष छुटसहितका मापदण्ड तोकेको छ।
८ साउन, काठमाडौं। नेपाल राष्ट्र बैंकले वालेट प्रयोगकर्तालाई राष्ट्रिय परिचयपत्र अनिवार्य गरेको छ। भुक्तानी सेवा प्रदायकले नेपाली नागरिकका हकमा राष्ट्रिय परिचयपत्रको विद्युतीय अभिलेख अनुसार विवरण सुनिश्चित गरी वालेट खोल्ने व्यवस्था गर्न निर्देशन दिएको हो। भुक्तानी सेवा प्रदायक संस्थाले २०७८ असोज मसान्तभित्र मोबाइल एप्लिकेसन वा अन्य उपयुक्त माध्यमबाट वालेट प्रयोगकर्ताको राष्ट्रिय परिचयपत्र विवरणको स्वघोषणा लिनुपर्ने व्यवस्था केन्द्रीय बैंकले गरेको छ।
राष्ट्रिय परिचयपत्र लिएका नेपाली नागरिकका हकमा २०७८ असोज मसान्तभित्र मोबाइल एप्लिकेसन वा अन्य उपयुक्त माध्यमबाट सम्बन्धित वालेट प्रयोगकर्ताको राष्ट्रिय परिचयपत्र नम्बर अद्यावधिक गर्नसमेत केन्द्रीय बैंकले निर्देशन दिएको छ। राष्ट्रिय परिचयपत्र नलिएका नेपाली नागरिकलाई राष्ट्रिय परिचयपत्र लिई ग्राहक पहिचान अद्यावधिक गर्न सम्बन्धित वालेट प्रयोगकर्तालाई मोबाइल एप्लिकेसन वा अन्य उपयुक्त माध्यमबाट प्रत्येक महिनामा जानकारी गराउने व्यवस्था मिलाउन समेत निर्देशन दिएको छ।
विदेशमा बसोबास गरिरहेका नेपालीले अनलाइनमार्फत विद्युतीय वालेट खोल्नुपर्दा राष्ट्रिय परिचयपत्र बाहेक आवश्यक कागजात लिएर वालेट खोल्न सक्ने केन्द्रीय बैंकले जनाएको छ। यसरी खोलिने वालेट सम्बन्धमा, वालेट प्रयोगकर्ताले नेपाल फर्किएको ३५ दिनभित्र सम्बन्धित अनुमतिपत्र प्राप्त संस्थाले राष्ट्रिय परिचयपत्र विवरण लिई अद्यावधिक गर्नुपर्ने व्यवस्था केन्द्रीय बैंकले गरेको छ। आफ्नो हेरचाह आफैं गर्न नसक्ने, अशक्त तथा असहाय नागरिकका हकमा राष्ट्रिय परिचयपत्र वा राष्ट्रिय परिचयपत्र नम्बर बाहेक आवश्यक कागजात संलग्न गरेर पनि वालेट खोल्न र कारोबार गर्न सकिने केन्द्रीय बैंकले जनाएको छ।
