भारतमा कक्रोच जनता पार्टी (सीजेपी)ले केन्द्र सरकारले उनका बाँकी मागहरू पनि स्वीकृत गरेको जानकारी दिएको छ। तेस्रो चरणको वार्तापछि सीजेपीका प्रवक्ताद्वय सौरभ दास र आशुतोष राङ्का तथा केन्द्रीय मन्त्रीहरू जेपी नड्डा र जितेन्द्र सिंहले संयुक्त पत्रकार सम्मेलन गर्दै उक्त जानकारी सार्वजनिक गरेका हुन्। यसअघि शनिबार दिउँसो सीजेपीको मागअनुसार शिक्षामन्त्री धर्मेन्द्र प्रधानले पदबाट राजीनामा दिएका थिए।
पत्रकार सम्मेलनमा सौरभ दासले सबै माग केन्द्र सरकारले स्वीकार गरेको भन्दै आन्दोलनकारीहरूलाई घर फर्कन आग्रह गरे। “सरकारले हाम्रा अन्य मागहरू पनि स्वीकार गरेको छ,” उनले भने। “सरकारले दिल्लीमा मात्र नभई देशका विभिन्न भागमा दर्ता गरिएका एफआईआर फिर्ता लिने सहमति जनाएको छ। भविष्यमा विरोध प्रदर्शनमा सहभागिता जनाउने कुनै पनि सीजेपी अभियानकर्ताविरुद्ध कारबाही नहुने प्रतिबद्धता सरकारले जनायो,” उनले थपे। आशुतोष राङ्काले एक करोड भारु क्षतिपूर्ति दिने विषयमा पनि सहमति भएको जनाएको छन्। केन्द्र सरकारले कानुन अनुसार उक्त क्षतिपूर्ति उपलब्ध गराउने प्रतिबद्धता व्यक्त गरेको छ।
सरकारी पक्षको प्रतिक्रियाक्रकोच जनता पार्टी प्रतिनिधिमण्डलसँगको वार्तापछि केन्द्रीय मन्त्री जेपी नड्डाले शनिबार दुई पक्षबीच लामो छलफल भएको जानकारी दिएका छन्। “आज हामीले विस्तृत छलफल गर्यौं। उनीहरूले आन्दोलनका क्रममा दर्ता भएका मुद्दाहरूको चारबुँदे लिखित प्रस्ताव पेस गरे। हामीले उनीहरूको अन्य दुई माग (प्रतिशोधात्मक कारबाही नहुने र क्षतिपूर्ति दिने) र पाँचबुँदे मागपत्र पनि छलफल गर्यौं,” उनले भने। “हामीले उनीहरूलाई एफआईआरको प्रतिलिपि उपलब्ध गराउनेछौं र उनीहरूविरुद्ध कुनै कारबाही हुनेछैन। क्षतिपूर्तिको विषयमा सरकारले स्पष्ट पारेको छ कि हामी उनका भावनाको कदर गर्छौं। हामी सबै मिलेर नियम-कानुन अनुसार क्षतिपूर्ति दिनेमा सहमत भएका छौं। सकेसम्म अधिकतम रकम उपलब्ध गराइनेछ।”
अभियानकर्मी सोनम वाङ्चुकले शिक्षामन्त्रीको राजीनामाको स्वागत गर्दै भने, “आज जे भयो त्यो लोकतन्त्रको विजय हो र म यसका लागि सम्पूर्ण देशवासीलाई बधाई दिन चाहन्छु।” उनले शान्तिपूर्ण आन्दोलनका लागि सबैको प्रशंसा गरेका छन्। “म आशा गर्छु भविष्यमा पनि शान्ति कायम रहनेछ र कुनै गलत घटना हुनेछैन,” उनले बताए। शिक्षामन्त्री धर्मेन्द्र प्रधानले भारी दबावपछि राजीनामा दिएका थिए। सामाजिक सञ्जाल एक्समा राजीनामाको घोषणा गर्दै प्रधानले भनेका थिए, “जन्तरमन्तर र देशमा सिर्जना भएको अवस्था देशविरोधी शक्तिहरूले फाइदा नउठाउनुहोस्।” काङ्ग्रेस अध्यक्ष मल्लिकार्जुन खडगेले शिक्षामन्त्रीको राजीनामालाई लाखौं युवाहरूको जितको रूपमा व्याख्या गरेका छन्।
