केडिया ग्रुपको आयोजनामा पहिलो पटक आयोजना हुन लागेको पुरुष भलिबल लिगका लागि आज अक्सन सम्पन्न हुँदैछ। ६ टोली सहभागी हुने यो लिग भदौ दोस्रो साता सुरु गरिने तय भएको छ। नेपाल भलिबल लिग (एनभीएल) को पहिलो संस्करणका लागि आज काठमाडौंमा खेलाडीहरूको अक्सन हुने छ। लिगमा सहभागी ६ फ्रेन्चाइज टोलीले सर्टलिस्टमा परेका १२९ खेलाडीमध्येबाट आफ्नो टिमका लागि ७–७ खेलाडी अनुबन्ध गर्नेछन्। प्रतियोगिता भदौ १२ गतेदेखि काठमाडौंको त्रिपुरेश्वरस्थित कभर्ड हलमा आयोजना गरिनेछ। १० साउन, काठमाडौं।
नेपालको पुरुष भलिबल फ्रेन्चाइज लिग, नेपाल भलिबल लिग (एनभीएल) को अक्सन आज आयोजना हुँदैछ। केडिया ग्रुपको आयोजनामा पहिलो पटक हुन लागेको पुरुष भलिबल लिगको लागि आज अक्सन गरिने छ। एनभीएलको पहिलो संस्करण भदौ १२ गतेदेखि काठमाडौंको त्रिपुरेश्वरस्थित कभर्ड हलमा सञ्चालन हुनेछ। नेपाली भलिबल इतिहासमा यो दोस्रो अक्सन हुनेछ। यसअघि गत वर्ष महिला फ्रेन्चाइज लिग, एवरेष्ट महिला भलिबल लिगको दोस्रो संस्करणअघि अक्सन सम्पन्न भएको थियो।
एनभीएलमा सगरमाथा स्म्यासर्स, मधेश वारियर्स, काठमाडौं रेड्स, अन्नपूर्ण स्पाइकर किङ्स, कर्णाली शिवराज र खप्तड फाल्कन्स सुन्दरपश्चिमले प्रतिस्पर्धा गर्नेछन्। नेपाल भलिबल लिगको अक्सनका लागि आयोजकले १२९ खेलाडीलाई सर्टलिस्ट गरेका छन्। यी खेलाडीहरूलाई दुई वर्गमा विभाजन गरेर अक्सन गरिने छ। क्याटेगोरी एमा ५६ र क्याटेगोरी बीमा ६३ खेलाडी समावेश छन्।
एनभीएलमा सहभागी ६ फ्रेन्चाइजले अक्सनबाट ७–७ खेलाडी आफ्नो टिममा अनुबन्ध गर्नेछन्, जसमा क्याटेगोरी एबाट ४ र क्याटेगोरी बीबाट ३ खेलाडी रहनेछन्। प्रत्येक टिमले मार्की खेलाडी पहिले नै अनुबन्ध गरिसकेका छन्। सगरमाथा स्म्यासर्सले हरिहरु थापा, मधेश वारियर्सले रविन नगरकोटी, काठमाडौं रेड्सले सुनिल बोहरा, अन्नपूर्ण स्पाइकर किङ्सले हिमाल सुनारी, कर्णाली शिवराजले पहल गहतराज र खप्तड फाल्कन्सले धिरज बस्नेतलाई मार्की खेलाडी बनाएका छन्।
अक्सनमा क्याटेगोरी एका खेलाडीको न्यूनतम मूल्य एक लाख र अधिकतम मूल्य एक लाख २० हजार तोकिएको छ। क्याटेगोरी बीका खेलाडीको लागि न्यूनतम मूल्य ५० हजार र अधिकतम ७० हजार निर्धारण गरिएको छ। एनभीएलमा हरेक टोलीमा १२–१२ खेलाडी रहनेछन्। जसमा मार्कीसहित ९ जना नेपाली खेलाडी र ३ जना विदेशी खेलाडी अनुबन्ध गर्न सकिनेछन्। साथै, हरेक टिमले ट्यालेन्ट हन्टबाट एक खेलाडी चयन गर्नुपर्नेछ।
