स्थानीय सञ्चारमाध्यमले अमेरिकी सेनाले इरानमाथिको सैन्य कारबाही स्थगित गरेको उल्लेख गरेका छन्। ओमानको प्रतिनिधिमण्डलसँग वार्तामा अवरोध नहोस् भन्ने उद्देश्यका साथ अमेरिकाले आक्रमण रोकेको सीबीएस न्युजले जनाएको छ। न्यूयोर्क टाइम्सका अनुसार, इन्टरसेप्टर क्षेप्यास्त्रको भण्डार घट्दै गएपछि राष्ट्रपति डोनाल्ड ट्रम्पले सैन्य कारबाही विस्तार गर्ने योजना स्थगित गरेका छन्। १० साउन, वाशिङटन (रासस/सिन्ह्वा)।
संयुक्त राज्य अमेरिकाको सेनाले इरानमाथिको सैन्य कारबाही रोकिएको स्थानीय सञ्चारमाध्यमहरूले जनाएका छन्। तथापि, आक्रमण स्थगित भएको कारणबारे सञ्चार माध्यमहरूमा भिन्न विवरण आएका छन्। सीएनएनले पेन्टागनका एक स्रोतलाई उद्धृत गर्दै अमेरिकी सैन्य कारबाही रोकिएको जनाएको छ, तर कति समयका लागि रोकिएको हो भन्ने कुरा स्पष्ट पार्न सकेको छैन।
सीबीएस न्युजले दुई क्षेत्रीय स्रोतलाई उद्धृत गर्दै, ओमानको प्रतिनिधिमण्डल स्ट्रेट अफ होर्मुज पुनः खोल्ने विषयमा वार्ताका लागि तेहरान जाने भएकाले वार्तामा अवरोध नहोस् भनेर अमेरिकाले आक्रमण स्थगित गरेको जनाएको छ। यसैबीच, न्यूयोर्क टाइम्सले उल्लेख गरेको छ कि अमेरिकी वरिष्ठ सल्लाहकारले वायु रक्षा प्रणालीमा प्रयोग हुने इन्टरसेप्टर क्षेप्यास्त्रको भण्डार घट्दै गएको भन्दै राष्ट्रपति ट्रम्पलाई सैन्य कारबाही विस्तार गर्ने योजना स्थगित गर्न सुझाव दिएका थिए।
अमेरिकी सेनाका संयुक्त प्रमुख कर्मचारी समितिका अध्यक्ष ड्यान केनले थप व्यापक सैन्य कारबाही गरिएमा अमेरिकी केन्द्रीय कमाण्डसँग रहेका इन्टरसेप्टर क्षेप्यास्त्रको भण्डार सकिन सक्ने चेतावनी दिएको न्यूयोर्क टाइम्सले जनाएको छ। अमेरिकाले अहिलेसम्म इरानविरूद्धको सैन्य कारबाहीमा एक हजार २०० भन्दा बढी प्याट्रियट इन्टरसेप्टर प्रयोग गरिसकेको छ। प्रत्येक इन्टरसेप्टरको लागत ४० लाख अमेरिकी डलरभन्दा बढी रहेको छ।
सम्बन्धित खबर
