काभा पुरुष भलिबल च्याम्पियनसिपमा नेपाल बंगलादेशसँग ३–२ सेटमा पराजित हुँदै लगातार चौथो हार बेहोर्न बाध्य भएको छ। पाँच सेटसम्म चलेको प्रतिस्पर्धात्मक खेलमा नेपाल पहिलो र तेस्रो सेट जिते पनि अन्ततः निर्णायक सेट १५–११ को हार भोग्नुपरेको छ। यसअघि कजाखस्तान, श्रीलंका र पाकिस्तानसँग पराजित नेपालले राउन्ड रोबिन लिग अन्तर्गत सोमबार उजवेकिस्तानसँग अन्तिम खेल खेल्ने तयारीमा छ। १० साउन, काठमाडौं।
काभा पुरुष भलिबल च्याम्पियनसिपमा नेपालले लगातार चौथो हार व्यहोरेको छ। आइतबार सम्पन्न प्रतिस्पर्धात्मक खेलमा नेपाल बंगलादेशसँग ३–२ सेटमा पराजित भएको हो। नेपालले पहिलो सेटलाई २५–१८ को फराकिलो अन्तरले जित्दै उत्कृष्ट सुरुआत गरेको थियो। तर दोस्रो सेटमा २५–१९ ले हार्दै बंगलादेशले खेल बराबरीमा ल्यायो। तेस्रो सेटमा नेपालले पुनः राम्रो प्रदर्शन गर्दै २५–२१ को जीत निकाल्यो। त्यसपछि चौथो सेटमा दुवै टोलीबीच कडा प्रतिस्पर्धा भएपनि नेपाल २५–२३ ले पराजित भयो र खेल निर्णायक पाँचौं सेटमा पुगेको थियो। निर्णायक पाँचौं सेटमा बंगलादेशले १५–११ को जित निकाल्दै खेल ३–२ को परिणामसहित आफ्नो पक्षमा पार्यो। नेपाल यसअघि कजाखस्तान, श्रीलंका र पाकिस्तानसँग पराजित भएको थियो। नेपालले राउन्ड रोबिन लिगको अन्तिम खेल सोमबार उज्बेकिस्तानसँग खेल्ने छ।
सम्बन्धित खबर
