समाचार सारांश
नेदरल्यान्ड्समा जारी आईसीसी क्रिकेट विश्वकप लिग २ अन्तर्गतको खेलमा नेपाल नामिबियासँग ३ रनले पराजित भयो। नामिबियाले दिएको २१२ रनको लक्ष्य पछ्याएको नेपालले निर्धारित ५० ओभरमा ६ विकेट गुमाएर २०८ रन मात्र बनाउन सक्यो। करण केसीले बलिङमा ५ विकेट हात पार्दै नेपालको लागि एकदिवसीय क्रिकेटमा १०० विकेट पुरा गर्ने दोस्रो खेलाडी बने। ११ साउन, काठमाडौं।
आईसीसी क्रिकेट विश्वकप लिग २ अन्तर्गत नेदरल्यान्ड्समा जारी ओडीआई शृङ्खलामा नेपालले लगातार तेस्रो हार व्यहोरेको छ। सोमबार राति सम्पन्न खेलमा नेपाल नामिबियासँग ३ रनले पराजित भएको छ। नामिबियाले दिएको २१२ रनको लक्ष्य पछ्याउने क्रममा नेपालले निर्धारित ५० ओभरमा ६ विकेट गुमाएर २०८ रन मात्र बनायो। नेपालका लागि आसिफ शेखले ८९ बलमा ४५ रन बनाए भने कप्तान रोहित पौडेलले ४१, आरिफ शेखले ३८ र कुशल भुर्तेलले ३४ रन बनाए। गुलशन झा १९ रनमा अविजित रहे। नेपाललाई अन्तिम ४ ओभरमा ४० रन आवश्यक थियो। ४७औं ओभरमा नेपालले ५ रन जोड्यो, ४८औं ओभरमा ७ रन र ४९औं ओभरमा १२ रन जोड्दै अन्तिम ओभरमा १७ रन आवश्यक पर्यो।
अन्तिम ओवर बलिङ गर्न नामिबियाका कप्तान जेरार्ड एरासमस मैदानमा आए। पहिलो बलमा लेगबाईबाट २ रन खर्चियो भने दोस्रो बलमा आरिफले १ रन लिए। तेस्रो बलमा गुलशनले चौका ठोकेपछि नेपाललाई ३ बलमा १० रन चाहियो। पछि गुलशनले २-२ रनमा दुई बल खेलेपछि नेपाललाई अन्तिम बलमा ६ रन चाहियो। एरासमसले वाइड फाल्दा १ बलमा ५ रन आवश्यक भयो। त्यसपछिको बलमा गुलशनले १ रन मात्र जोड्न सके। नामिबियाका लागि ज्याक ब्रासेलले ३ विकेट लिए भने रुबेन ट्रम्पलमनले २ विकेट लिए, थप एक विकेट रन आउटबाट प्राप्त भयो। बर्नार्ड स्कोल्जले १० ओभरमा मात्र १४ रन खर्चेर किफायती बलिङ गरे।
पहिले ब्याटिङ गर्दै नेदरल्यान्ड्समा टस हारेर नामिबियाले निर्धारित ५० ओभरमा ७ विकेट गुमाई २११ रन बनाएको थियो। नामिबियाका लागि जान फ्रायलिंकले शतक प्रहार गरे। १४९ बलमा ३ चौका प्रहार गर्दै १०० रन बनाएपछि रन आउट भए। लाउरेन स्टिनकाम्पले ८७ बल खेल्दै ४ चौका र १ छक्का प्रहार गरी ५९ रन योगदान दिए। फ्रायलिंक र स्टिनकाम्पले दोस्रो विकेटका लागि १३१ रनको साझेदारी गरे। नेपालका मिडियम पेसर करण केसीले उत्कृष्ट बलिङ गरे, १० ओभरमा २ मेडन सहित २९ रन खर्ची ५ विकेट लिए। यो उनको ओडीआई करियरमा चौथो पटक ५ विकेट लिने प्रदर्शन हो। करण यस खेलबाट नेपालको लागि ओडीआईमा १०० विकेट लिने दोस्रो खेलाडी बने। सोमपाल कामीले १ विकेट लिए। नेपालले यसअघि खेलेका दुवै खेलमा पराजय भोगेको थियो। शीर्ष चार स्थानमा रहन नसकेको नेपाललाई ओडिआई विश्वकप ग्लोबल क्वालिफायरमा स्थान बनाउन थप चुनौती आउन लागेको छ। नेपालले यस शृङ्खलाको अन्तिम खेल बुधबार नेदरल्यान्ड्ससँग खेल्नेछ।
