‘शिन्तामणि मुस्ताङ’ विश्वकै सबैभन्दा विलासी होटलको पहिलो स्थानमा

मुस्ताङस्थित शिन्तामणि मुस्ताङ होटल रब रिपोर्ट्सको ‘५० ग्रेटेस्ट लक्जरी होटल्स अन अर्थ २०२६’ सूचीमा विश्वकै पहिलो स्थानमा आएको छ। शेर्पा हस्पिटालिटी ग्रुपका सीईओ नाम्ग्याल शेर्पाले यस सफलताले नेपाललाई एक विशिष्ट लक्जरी गन्तव्यको रूपमा प्रमाणित गरेको बताउनुभयो। २९ कोठा भएको यस होटलमा बस्न कम्तिमा पाँच दिनको बुकिङ अनिवार्य छ र प्रतिरात न्यूनतम १ हजार ८ सय अमेरिकी डलर भाडा लाग्छ। ११ साउन, काठमाडौं।

सन् २०२६ का लागि रब रिपोर्ट्सले तयार पारेको ‘५० ग्रेटेस्ट लक्जरी होटल्स अन अर्थ २०२६’ सूचीको पहिलो नम्बरमा शिन्तामणि पुगेको हो। संसारका २४ प्रमुख ट्राभल विशेषज्ञहरुको प्यानलले शिन्तामणिलाई पहिलो स्थानमा चयन गरेको हो। तल्लो मुस्ताङमा रहेको शिन्तामणि बिल बेन्स्लेले डिजाइन गरेका हुन्। यती समूहको शेर्पा हस्पिटालिटी ग्रुप (एसएचजी) ले अगस्ट २०२३ देखि शिन्तामणि सञ्चालन गरिरहेको छ। होटलका प्रत्येक कोठाबाट देखिने मनमोहक दृश्यले जोसुकैले फरक अनुभूति लिन पाउने रब रिपोर्टले उल्लेख गरेको छ।

‘यो होटलको मात्र पहिचान नभई एउटा सपनाको सफलताको उदाहरण हो,’ एसएचजीका प्रमुख कार्यकारी अधिकृत (सीईओ) नाम्ग्याल शेर्पाले भने, ‘वर्षौंदेखि हामीले नेपाललाई संसारको एक विशेष लक्जरी गन्तव्य बनाउन भिजन अनुसार काम गर्दै आएका थियौं, र अब यसले त्यो सफलतामा पुगेको छ।’ शिन्तामणि सम्भवत: नेपालकै सबैभन्दा महँगो होटलमध्ये एक हो। यो होटलमा २९ कोठा छन्। यहाँ बस्नलाई स्वदेशी वा विदेशी पाहुनाले कम्तिमा पाँच दिनको बुकिङ गर्नुपर्छ। शिन्तामणिमा एक रात बस्न न्यूनतम १८०० अमेरिकी डलर भाडा लाग्नेछ। यस भाडामा १३% मूल्य अभिवृद्धि कर (भ्याट) र २% लक्जरी करपनि समावेश छैन। दुई जनाका लागि तयार पारिएको प्याकेजमा कोठा, वेलनेस कार्यक्रम, खाना तथा पेय पदार्थ समावेश रहेको छ, होटलले जनाएको छ।

रब रिपोर्ट्सको सो सूचीमा दोस्रो स्थानमा र्वान्डाको सिंगिटा क्विटोन्डा, तेस्रोमा स्कटल्यान्डको होप लज, चौथोमा जापानको पार्क ह्यात टोक्यो, पाँचौंमा भारतको शक्ति प्राण, छैटौंमा इटालीको कोलेजियो एल्ला क्वेर्स, सातौंमा बेलायतको क्याल्रिजेज, आठौंमा फ्रान्सको ले ब्रिस्टल पेरिस, नवौंमा पनामाको आइसल्यास सेकार र दसौं स्थानमा माल्टाको कासा बोनाभिटा रहेका छन्।