फ्रान्सका विभिन्न भागमा फैलिरहेको डढेलोबाट(boardo) दक्षिणपश्चिमी शहर बोर्डोको लगभग १५ किलोमिटर टाढासम्म पुग्दा बोर्डोका नगरप्रमुखले सबै सम्भावित परिस्थितिको सामना गर्न तयार रहेको बताएका छन्। “यदि थप क्षेत्र खाली गर्नुपर्ने आदेश आयो भने हामी ठूलो संख्यामा मानिसहरूलाई आश्रय दिन तयार छौं,” मेयर थोमा काज्नभले बताए।
जिरोन्ड क्षेत्रमा फैलिएको डढेलोलाई अवलोकन गर्न पुगेका फ्रान्सका राष्ट्रपति एम्यानुएल माक्रोँले देशले ‘पूर्ण रूपमा अभूतपूर्व’ डढेलोको सामना गरिरहेको बताए। उनले यसलाई दोस्रो विश्वयुद्धयताको यताकै कठिन डढेलोको रूपमा वर्णन गरे। फ्रान्समा अहिलेसम्म करिब २ लाख २० हजार मानिसलाई सुरक्षित स्थानमा सारिएको छ भने छिमेकी स्पेनमा मड्रिडको पश्चिमी भागमा नियन्त्रण बाहिर गएको आगोका कारण १ लाखभन्दा बढी मानिस विस्थापित भएका छन्।
मङ्गलबार देखि पुनः प्रारम्भ हुने तीव्र गर्मीले डढेलो नियन्त्रणको प्रयासलाई अझ चुनौतीपूर्ण बनाउने अनुमान गरिएको छ। माक्रोँले लादँ क्षेत्रमा लागेको सानो डढेलो नियन्त्रणमा आएको तर जिरोन्ड क्षेत्रको आगो नियन्त्रणका लागि संघर्ष अझै जारी रहेको उल्लेख गरे। यसअघि फ्रान्सका आन्तरिक मामिला मन्त्री लोराँ नुन्यजले यो डढेलो ‘आफ्नो गति र दिशामा फैलिरहेको’ बताउँदै नियन्त्रण गर्न कठिनाइ भएको बताएका थिए।
बोर्डोको दक्षिणमा पर्ने सेस्टास नगरपालिकाका मेयर जेरोम स्टेफेले एउटा अन्तर्वार्तामा यस डढेलोलाई ‘शताब्दीकै सबैभन्दा ठूलो’ भने। उनले दुई दिनअघि आगो तीव्र रूपमा फैलिँदा १७ हजारवटा बासिन्दालाई रातारात सुरक्षित स्थानमा सार्नुपरेको जानकारी दिए। उनका अनुसार अहिलेसम्म ४२ हजार हेक्टर क्षेत्र प्रभावित भइसकेको छ र २४० घरहरु नष्ट भएका छन्। “मेरो नगरको अवस्था साँच्चिकै विनाशकारी बनेको छ,” उनले थपे।
उनका अनुसार वर्तमानमा डढेलो पहिलेजस्तै तीव्र गतिमा फैलिरहेको छैन, तर भने, ‘सानो मात्र सफलता हासिल गरेका छौं। यदि हावाले फिलिङ्गो उडाएर ल्यायो वा हावाको दिशा अचानक परिवर्तन भयो भने ठूलो जोखिम अझै छ।’ “हामीले सुरक्षात्मक आगो रेखा बनाउन आफ्नो सम्पूर्ण शक्ति लगाइरहेका छौं,” उनले बताए। फ्रान्सका अन्य धेरै क्षेत्रहरूमा पनि डढेलो फैलिरहेको छ, जसमा भार, लादँ र कोर्सिका टापुस्थित हुइट-कोर्स क्षेत्र पनि समावेश छ।
त्यसैगरी छिमेकी स्पेनको राजधानी मड्रिडको पश्चिमी क्षेत्रमा पनि भीषण डढेलो फैलिएको छ र वहाँ पाँचौं दिनसम्म राष्ट्रिय सङ्कटकाल जारी छ। मड्रिड पश्चिमी क्षेत्रमा फैलिएको आगोको अवस्थाबारे भू-उपग्रह तस्बिरहरूको विश्लेषणले देखाएको छ कि आगोले अहिलेसम्म २७ हजार हेक्टरभन्दा बढी जमिन प्रभावित पारेको छ। स्थानीय अधिकारीहरूले उक्त क्षेत्रमा ‘इतिहासकै सबैभन्दा खराब डढेलो’ भोगिएको बताएका छन्। ‘कोपर्निकस क्लाइमेट चेन्ज सर्भिस’ अनुसार जलवायु परिवर्तनले विश्वभरि तापक्रम वृद्धि गराएको छ र युरोप विश्वमै सबैभन्दा तीव्र रूपमा गर्मी थप्दै गएको महादेश बनेको छ। युरोपमा तापक्रम विश्वव्यापी औसतमाथि लगभग दोब्बर गतिमा बढिरहेको छ, जसले गर्मी ऋतुमा तीव्र तातोपना, पानी अभावमा दबाब र भीषण डढेलोको जोखिम बढाएको छ।
