अर्थमन्त्री डा. स्वर्णिम वाग्लेले निजी क्षेत्रले स्वदेशी उत्पादनमार्फत निर्यात विस्तार गर्दै अर्थतन्त्र निर्माणमा नेतृत्व दिनुपर्ने बताउनु भयो। उहाँले सरकारले लगानी सुरक्षित राख्दै उद्यमशीलता र रोजगारीमार्फत राष्ट्रिय अर्थतन्त्रलाई गतिशील बनाउने उद्देश्यले निजी क्षेत्रसँग सहकार्यमा प्रतिबद्धता जनाएको स्पष्ट पार्नुभयो। बजेटमार्फत घोषणा गरिएको आर्थिक सुधार कार्यक्रम, पूँजीगत खर्च वृद्धि र लगानीमैत्री वातावरण सिर्जनाका लागि आवश्यक कानुनी संशोधन प्रक्रिया तीव्र रूपमा अगाडि बढाइरहेको जानकारी दिनुभयो।
१२ साउन, काठमाडौं। अर्थमन्त्री वाग्लेले आयातमा आधारित उपभोगमुखी अर्थतन्त्रबाट स्वदेशी उत्पादनमार्फत आयात प्रतिस्थापन गर्दै निर्यात विस्तार गर्ने अर्थतन्त्र निर्माणमा उद्योग क्षेत्रले नेतृत्व गर्नु पर्ने बताए। मंगलबार सिंहदरबारमा उद्यमीसँगको छलफल कार्यक्रममा बोल्दै उहाँले लामो समयदेखि गुमाउँदै आएको औद्योगिक अवसरलाई सरकारले निजी क्षेत्रको सहकार्यबाट पुनःस्थापना गर्न जोड दिनुभयो।
उहाँले निजी क्षेत्रले गरेको लगानी सुरक्षित राखिने, उचित प्रतिफल प्राप्त हुने र पुनः लगानी गर्न सकिने वातावरण सरकारले निर्माण गर्ने प्रतिबद्धता व्यक्त गर्नुभयो। निजी क्षेत्रको सफलताले राष्ट्रिय अर्थतन्त्रको सफलता सुनिश्चित हुने विषयमा सरकार स्पष्ट रहेको उल्लेख गर्दै उद्यमीको नाफा र सम्पत्तिको सुरक्षा उच्च प्राथमिकतामा रहेको बताउनुभयो।
उहाँले चालु आर्थिक वर्षको बजेटमार्फत घोषणा गरिएका आर्थिक सुधार कार्यक्रमहरू तीव्र गतिमा कार्यान्वयनमा रहेको पनि औंल्याउनुभयो। पूँजीगत खर्चको गति वृद्धि, आयोजना कार्यान्वयन तीव्र बनाउने, पूँजी बजार साथै वित्तीय क्षेत्र सुधार गर्ने र लगानीमैत्री वातावरणलाई सुदृढ पार्ने कार्यहरू एकैपटक तीव्र रूपमा अगाडि बढिरहेको उल्लेख गर्नुभयो।
