आईसीसीले सार्वजनिक गरेको पछिल्लो एकदिवसीय अन्तर्राष्ट्रिय (ODI) वरियतामा नेपाली टोली एक स्थान तल झरेर १८औं स्थानमा पुगेको छ। नेदरल्यान्ड्समा जारी लिग २ को ओडीआई श्रृङ्खलामा लगातार तीन खेलमा पराजित भएपछि नेपालको वरियतामा गिरावट आएको हो। निरन्तर कमजोर प्रदर्शनका कारण नेपालले सिधै एकदिवसीय विश्वकप छनोटमा प्रतिस्पर्धा गर्ने सम्भावना पनि घट्दै गएको छ। १२ साउन, काठमाडौं।
नेपाली क्रिकेट टोली आईसीसीको ओडीआई वरियतामा एक स्थान तल झरेको छ। आईसीसीले सोमबारसम्मको तथ्यांक अनुसार ताजा अपडेट गरिएको नयाँ वरियतामा नेपाल १७औं स्थानबाट १८औं स्थानमा झरेको हो। नेपालले नेदरल्यान्ड्समा भैरहेको लिग २ को ओडीआई श्रृङ्खलामा लगातार तीन खेल हार बेहोरेको छ। नेपालले नामिबियासँग दुई तथा नेदरल्यान्ड्ससँग एक खेलमा पराजित भएको छ। नामिबियाले नेपाललाई पछ्याउँदै १७औं स्थानमा उक्लिएपछि नेपाल १८औं स्थानमा झरेको हो। पछिल्ला निराशाजनक प्रदर्शनका कारण नेपालले सिधै एकदिवसीय विश्वकप छनोट खेल्ने सम्भावना पनि निकै घट्दै गएको छ।
