साउन २६ देखि ३१ गतेसम्म काठमाडौंको भृकुटीमण्डपमा दोस्रो संस्करणको ‘नाइमा नेपाल मोबिलिटी एक्स्पो–२०२६’ आयोजना हुँदैछ। एक्स्पोमा ५५ भन्दा बढी अटोमोबाइल ब्रान्डहरूले सहभागिता जनाउनेछन् र ४० भन्दा बढी नयाँ सवारीसाधनका मोडेलहरू सार्वजनिक गरिने तयारी छ। आयोजक नाइमाका अनुसार यसपटकको एक्स्पोमा अटोमोबाइल क्षेत्रका विशेषज्ञहरूबीच विभिन्न प्राविधिक विषयमा नि:शुल्क सिकाइ सत्रहरू सञ्चालन गरिनेछन्।
नेपाल अटोमोबाइल इम्पोर्टर्स एन्ड म्यानुफ्याक्चरर्स एसोसिएसन (नाइमा) द्वारा आयोजना गरिएको यो एक्स्पो देशकै सबैभन्दा ठूलो अटो एक्स्पो मानिन्छ र अहिले तयारीको अन्तिम चरणमा पुगेको छ। एक्स्पोमा आउने अवलोकनकर्ताले १०० देखि २०० रुपैयाँ शुल्क तिरेर प्रवेश गर्ने व्यवस्था मिलाइएको छ। एक्स्पोका सदस्य तथा शारदा ग्रुपका निर्देशक गौरव शारदासँग एक्स्पो तयारी र व्यवस्थापनका बारेमा गरिएको कुराकानीमा उनले भने, “हाम्रा तयारीहरू लगभग पूरा भइसकेका छन् र अब कार्यान्वयन मात्र बाँकी छ।”
यसपटक एक्स्पोको ६ दिन नेपाल पुलिस क्लबको ‘ब्लु प्याभिलियन’ मा सिकाइ सत्रहरू राखिनेछन् जहाँ अटोमोबाइल र मोबिलिटी क्षेत्रका अन्तर्राष्ट्रिय तथा स्थानीय विज्ञ, इन्फ्लुएन्सर र सरोकारवालाबीच विभिन्न विषयमा छलफल हुनेछ। सडक सुरक्षा, कौशल विकास, ब्याट्री व्यवस्थापन र इथानोल ब्लेन्डिङजस्ता विषयमा नि:शुल्क टक शोहरू पनि आयोजना गरिनेछन्।
यस पटक ५५ भन्दा बढी ब्रान्ड सहभागी हुनेछन् र ४० भन्दा बढी नयाँ मोडेलहरू लन्च गरिनेछन्। सबै ब्रान्डहरूले ग्राहकलाई आकर्षित गर्न विशेष अफरहरू ल्याउनेछन्। एक्स्पोको प्रमुख उद्देश्य भनेको ग्राहक र कम्पनीलाई एउटै स्थानमा ल्याउनु हो। यस एक्स्पोमा आउने दर्शक र खरिद योजना बनाउने उपभोक्तालाई यो इतिहासकै सबैभन्दा ठूलो अटो शोको रूपमा स्वागत गरिएको छ।
