नेपाल आयल निगमले चितवनको लोथरमा देशकै सबैभन्दा ठूलो पेट्रोलियम भण्डारण गृहको निर्माण कार्य आधिकारिक रूपमा सुरु गरेको छ। निगमका निमित्त कार्यकारी निर्देशक दीपक बरालले पहिलो चरणको जग्गा व्यवस्थापन कार्यको शिलान्यास गर्दै तोकिएको अवधिभित्र काम सम्पन्न गर्ने प्रतिबद्धता व्यक्त गरे। यो परियोजना सम्पन्न भएपछि ९१ हजार ९०० किलोलिटर इन्धन भण्डारण क्षमता विकास हुनेछ, जसले ढुवानी खर्च र प्राविधिक चुहावटमा कमी ल्याउनेछ।
इन्धन आपूर्तिको दीर्घकालीन सुरक्षा र भण्डारण क्षमता वृद्धि गर्ने रणनीतिक योजनाअन्तर्गत नेपाल आयल निगमले चितवनको लोथरमा निर्माण कार्य सुरु गरेको हो। बुधबार निगमका निमित्त कार्यकारी निर्देशक दीपक बरालले राप्ती नगरपालिकास्थित लोथरमा ‘भूमि पूजा’ गरी पहिलो चरणको कामको शिलान्यास गरे। उनले भने, ‘खुला प्रतिस्पर्धाबाट निर्माण कम्पनी छनोट गरेर हामीले यो रणनीतिक महत्त्वको परियोजनाको पहिलो चरणको काम प्रारम्भ गरेका छौं।’
निगमका अनुसार २५ विघा ७ धुर क्षेत्रफलमा फैलिएको यस आयोजनाको पहिलो चरणमा जग्गालाई निर्माणयोग्य बनाउने कार्य हुनेछ। यस कार्यका लागि निगमले खुला प्रतिस्पर्धाबाट ‘मोतीधन–डीएस जेभी’ लाई ७९ करोड ५४ लाख रुपैयाँमा ठेक्कापत्र दिएको छ। उपनिर्देशक प्रदीप यादवले भने, ‘हामीले निर्माण कम्पनीलाई रातदिन नभनी कामलाई तीव्रता दिन निर्देशन दिएका छौं। हाम्रो लक्ष्य ६ देखि ९ महिनाभित्र जग्गाको सम्पूर्ण पूर्वतयारी पूरा गरेर आइओसीलाई जिम्मा दिने हो।’
यस परियोजनामा बारा अमलेखगंजदेखि चितवन लोथरसम्म ६२ किलोमिटर लामो पेट्रोलियम पाइपलाइन निर्माण गरिनेछ। पाइपलाइन निर्माणमा लाग्ने करिब ४ अर्ब २८ करोड ८० लाख रुपैयाँ आइओसीले अनुदान स्वरूप बेहोर्नेछ। भण्डारण गृह निर्माणमा लाग्ने अनुमानित ९ अर्ब ८० करोड रुपैयाँ भने नेपाल आयल निगमले आइओसीलाई उपलब्ध गराउने छ। यस परियोजनाले बागमती सहित आसपास क्षेत्रको इन्धन आवश्यकतालाई लामो समयसम्म पूरा गर्न सक्षम हुनेछ।
