विराटनगर विमानस्थलबाट काठमाडौंबाट पठाउन लागिएको पार्सलबाट प्रहरीले १८.४८ ग्राम ब्राउन सुगर बरामद गरेको छ। प्रहरीले विराटनगर–९ स्थित कुरिअर सेवा मार्फत पठाइएको स्पोर्ट्स सुजको जुत्ताको सोलभित्र लुकाइएको प्रतिबन्धित लागुऔषध फेला पारेको हो। घटनामा संलग्न २४ वर्षीय सुशान्त खड्कालाई पक्राउ गरी थप अनुसन्धान भइरहेको मोरङ प्रहरीले जनाएको छ।
१४ साउन, विराटनगर। विराटनगर विमानस्थलबाट काठमाडौंबाट पठाउन लागिएको एक पार्सलबाट प्रहरीले १८.४८ ग्राम प्रतिबन्धित लागुऔषध ब्राउन सुगर बरामद गरेको छ। बुधबार साँझ विराटनगर महानगरपालिका–९, महेन्द्रचोकस्थित एक्सपो एक्सप्रेस कुरिअर सेवाबाट पठाइएको स्पोर्ट्स सुजलाई एक्स–रे मेसिनबाट जाँच गर्ने क्रममा जुत्ताको सोल भित्र लुकाइएको अवस्थामा ब्राउन सुगर फेला परेको मोरङ प्रहरीले जनाएको छ।
यस घटनामा संलग्नको आरोपमा प्रहरीले विराटनगर–५ का २४ वर्षीय सुशान्त खड्कालाई पक्राउ गरेको छ। उनी उक्त पार्सल विमानस्थलमा ल्याउन पुगेका थिए। प्रारम्भिक अनुसन्धानअनुसार उक्त पार्सल विराटनगरका राघव झाले काठमाडौंबाट पठाउन लगाएको खुलेको छ। प्रहरीले उनको खोजी गरिरहेको जनाएको छ। मोरङ प्रहरीका प्रवक्ता डीएसपी मकेन्द्रकुमार मिश्रका अनुसार पक्राउ परेका खड्कामाथि थप अनुसन्धान भइरहेको छ।
