नागरिक शान्ति सुरक्षा र स्वास्थ्यकर्मीहरूको पेसागत सुरक्षा सुनिश्चित गर्न आम जनता पार्टीको आग्रह

१४ साउन, काठमाडौं । आम जनता पार्टी पर्सा जिल्ला कमिटीले पर्सास्थित नारायणी अस्पतालमा कार्यरत चिकित्सकमाथि भएको कुटपिट र त्यसपछि विरोधमा उत्रिएका चिकित्सकहरूमाथि प्रहरी प्रशासनले देखाएको दुर्व्यवहारप्रति गम्भीर ध्यानाकर्षण गरेको छ। आजपा पर्साका इन्चार्ज रन्जुकुमारी साहले जारी गरेको विज्ञप्तिमा उपचारमा संलग्न चिकित्सकमाथि कुटपिट र विरोधमा उत्रिएका चिकित्सकहरूमाथि प्रहरी प्रशासनले गर्ने दुर्व्यवहारप्रति ध्यानाकर्षण भएको उल्लेख गरिएको छ।

सुनसरी जिल्लाको देवानगञ्ज–३ स्थित कप्तानगञ्जमा भएको विवादपछि सुरक्षा निकायले गरेको गैरजिम्मेवारपूर्ण गोलीकाण्डले सुनसरी र मोरङको विराटनगर क्षेत्रमा अशान्ति फैलिरहेको बेला पर्सामा यो अर्को दुःखद घटना भएको रन्जुकुमारी साहले बताएकी छिन्। उनले जारी गरेको विज्ञप्तिमा भनिएको छ, ‘सुनसरीको घटना सेलाउन नपाउँदै पर्सामा आफ्नो कार्यक्षेत्रमा खटिएका चिकित्सकमाथि कुटपिट हुनु, र प्रमुख जिल्ला अधिकारीको उपस्थितिमा भइरहेको वार्ताकै क्रममा पर्साका उपरीक्षकले आन्दोलनरत चिकित्सकहरुलाई धक्कामुक्का र दुर्व्यवहार गर्नु अत्यन्तै खेदजनक छ।’

इन्चार्ज साहले यी शृङ्खलावद्ध घटनाले नेपाल सरकार र मातहतका सुरक्षा निकायहरू आम नागरिक तथा पेसागत कर्मचारीहरू प्रति असहिष्णु र आक्रामक हुँदै सर्वसाधारणमा त्रास सिर्जना गर्ने उदेश्यले काम गरिरहेको टिप्पणी गरेकी छिन्। उनको माग छ कि सरकारले सुनसरी र पर्सामा भएका घटनाहरुको पूर्ण जिम्मेवारी लिनुपर्छ। उनले यी घटनाको निष्पक्ष र सत्यतथ्य छानबिन गरी दोषीमाथि तुरुन्त कडा कारबाही गर्न, आम नागरिकको शान्ति सुरक्षाको सुनिश्चितता गर्न, स्वास्थ्यकर्मीहरूको पेसागत सुरक्षा पूर्ण रूपमा ग्यारेन्टी गराउन तथा अत्यावश्यक स्वास्थ्य सेवालाई तत्काल सुचारु गराउन सरकारसमक्ष जोडदार माग गरेकी छिन्।