नेपाली फुटबल खेलाडी अनन्त तामाङ र एरिक विष्ट बंगलादेशको फोर्टिस एफसी लिमिटेडमा अनुबन्धित भएका छन्। खेलाडीहरूले बंगलादेश प्रिमियर लिगसँगै एएफसी च्यालेन्ज लिगको प्रारम्भिक चरण खेल्ने गरी सम्झौता गरेका छन्। नेपालमा शीर्ष डिभिजनको लिग नहुँदा खेलाडीहरू विदेशका लिग खेल्न जान बाध्य भएका हुन्। १४ साउने, काठमाडौं।
नेपाली फुटबलरहरू अनन्त तामाङ र एरिक विष्ट बंगलादेशी क्लब फोर्टिस एफसी लिमिटेडमा अनुबन्ध भएका छन्। बंगलादेश प्रिमियर लिग फुटबलका लागि फोर्टिस एफसीले डिफेन्डर अनन्त र मिडफिल्डर एरिकलाई अनुबन्ध गरेको हो। लिगका लागि उनीहरू बंगलादेश पुगिसकेका छन्। अनन्तले गत सिजन पनि फोर्टिसबाटै बगलादेशको लिग खेलेका थिए भने एरिकले ब्रदर्थ युनियनबाट लिग खेलेका थिए। अनन्त र एरिकले पहिलो पटक एउटै क्लबबाट बंगलादेशी लिगमा खेल्न लागेका हुन्। यी दुईले राष्ट्रिय टिमदेखि नेपालको घरेलु लिगमा पनि सँगै खेलिसकेका छन्।
बंगलादेशको लिग करिब ६ महिना सञ्चालन हुनेछ। लिग र एएफसी च्यालेन्ज लिगको प्रारम्भिक चरणको खेल खेल्ने सम्झौता भएको एरिकले बताए। बंगलादेशबाट बंगलादेश पुलिस एफसी र फोर्टिस एफसीले एएफसी च्यालेन्ज लिगको प्रारम्भिक चरण खेल्नेछन्। जहाँ फोर्टिसले अगष्ट ११ मा किर्गिस्तानको मुरास युनाइटेडसँग खेल्नेछ भने बंगलादेश पुलिसले सिरियाको अल इतिहास अहलीसँग खेल्नेछ। यदि यो खेल जित्न सफल भए एएफसी च्यालेन्ज लिगको मुख्य चरणमा प्रवेश गर्नेछन्। बंगलादेशको फुटबल लिग भने अगष्ट अन्तिममा सुरु हुँदैछ। नेपालमा लामो समयदेखि शीर्ष डिभिजनको लिग सञ्चालन हुन सकेको छैन र अखिल नेपाल फुटबल सङ्घ (एन्फा) अहिले पनि फिफा निलम्बनमा छ। नेपालमा फुटबल गतिविधि नहुँदा खेलाडीहरूले अन्य देशका लिगहरू खेल्न गएका हुन्।
