अभिनेत्री तथा बीजेपी सांसद कंगना रनौतले ‘जेन जि’ पुस्ता र नीट पेपर लीक विरुद्ध आन्दोलन गर्ने विद्यार्थीहरूलाई लक्षित गर्दै विवादस्पद टिप्पणी गरेकी छन्। उनले प्रदर्शनकारी युवाहरुलाई ‘गटर जेनेरेसन’ भन्दै उनीहरूको व्यवहार र भाषाप्रति आपत्ति जनाएपछि देशभर आलोचना हुँदैछ। विवाद बढेपछि कंगनाले स्पष्टिकरण दिँदै भनिन् कि उनले अश्लील व्यवहारको विरोध गरिरहेकी छिन् र सबैले मर्यादामा बस्न आवश्यक छ भन्ने धारणा राखेकी छिन्।
कंगना रनौत फेरि विवादको केन्द्रमा आएकी छिन्। केही दिनअघि दिल्लीको जन्तर-मंतरमा नीट पेपर लीकविरुद्ध विद्यार्थीहरूले आन्दोलन गरे। सो आन्दोलन र ‘जेन जि’ पुस्तामाथि उनले विवादस्पद शब्द प्रयोग गरिन्। आन्दोलनमा प्रयोग भइरहेको भाषा र विभिन्न भिडियो रिल्सप्रति उनले असहमतिका साथै आलोचना गरिन्। उनले युवा पुस्तालाई ‘गटर जेनेरेसन’ भनेकी छिन्।
कंगनाले इन्स्टाग्राम स्टोरी र मिडियासँग कुराकानीमा प्रदर्शनकारी युवक-युवतीहरूलाई लक्षित गर्दै भनिन्, ‘मेरो जीवनमा यति अनौठो र यति नराम्रो व्यवहार मैले कहिल्यै देखेको छैन। यी युवालाई कसले जन्मायो? यी गटरको पुस्ता हुन्। यी केटीहरू राम्रो गृहिणी समेत बन्न सक्दैनन्।’ यस अभिव्यक्तिपछि देशका विभिन्न समूह र राजनीतिक दलहरूले कंगनाका बयानको कडा आलोचना गरेका छन्।
कंगनाले आन्दोलनमा भाइरल भएका केहि युवतीहरूको रिल्सको आलोचना गर्दै उनीहरूलाई ‘गटर जेनेरेसन’ भनेकी छिन्। उनले ती युवतीहरूलाई पश्चिमी संस्कृतिको प्रभावमा रहेको आरोप लगाउँदै भनिन्, ‘यी युवतीहरू स्वतन्त्रताको नाममा नशालु पदार्थ र रक्सी सेवन गरि त्यसलाई सामाजिक सञ्जालमा प्रदर्शन गर्छन्। उनीहरूले मेहनत गरेर काम गर्ने महिलाको नक्कल गर्छन्।’ कंगनाले ती भाइरल रिल्स हेरेर आफूलाई ‘डिजिटल डिटक्स’ आवश्यक भएको महसुस गरिन्।
