सौन्दर्य प्रसाधन क्षेत्रमा ओम्ब्रे लिप्स, ब्लर लिप्स र ग्लोसी फिनिस जस्ता पाँच नयाँ लिपस्टिक शैलीहरू यस वर्ष निकै लोकप्रिय भइरहेका छन्। अनुहारको आकर्षण बढाउन मेकअपका विभिन्न उपायहरू अपनाइन्छन्। तर कहिले काँही ओठमा लगाइने लिपस्टिकले नै सम्पूर्ण अनुहारलाई नयाँ रूप दिन सक्छ। त्यसैले लिपस्टिकलाई सौन्दर्य प्रसाधनका सबैभन्दा प्रभावशाली उत्पादनमा गनिन्छ। समयसँगै यसको रङ, बनावट र लगाउने शैलीमा पनि परिवर्तन आएछ। केही वर्षअघिसम्म गाढा म्याट लिपस्टिकको प्रभुत्व थियो भने अहिले प्राकृतिक देखिने, हल्का ब्लेन्ड गरिएको र चम्किलो फिनिस भएका शैलीहरू लोकप्रिय बन्दैछन्।
वर्षैपिच्छे लिपस्टिक स्टाइलका ट्रेन्डबारे चर्चा चल्छ। यस पटक पनि पाँच शीर्ष स्थानमा केही लिपस्टिक शैलीहरूले आफ्नो ठाउँ बनाएका छन्। ओम्ब्रे लिप्स अहिले सबैभन्दा चर्चित ट्रेन्डमध्ये एक हो। यसमा दुई फरक रङका लिपस्टिक प्रयोग गरिन्छ। सामान्यतया ओठको बाहिरी भागमा गाढा रङ जस्तै डार्क ब्राउन, प्लम वा गाढा रातो लगाइन्छ भने बीचको भागमा हल्का न्यूड, पिङ्क वा पिच रङ प्रयोग गरिन्छ। त्यसपछि दुवै रङलाई बिस्तारै ब्लेन्ड गरेर प्राकृतिक ग्रेडियन्ट तयार गरिन्छ। यसरी तयार भएको ओठ सामान्यभन्दा भरिलो, मुलायम र आकर्षक देखिन्छ। विशेष गरी साँझको पार्टी, विवाह, उत्सव वा फोटोसुटका लागि यो शैली धेरै उपयुक्त हुन्छ।
के-ब्यूटी अर्थात कोरियन सौन्दर्य शैलीबाट लोकप्रिय बनेको ब्लर लिप्स अहिले विश्वव्यापी ट्रेन्डमा छ। यसमा लिपस्टिक ओठको बीचको भागमा मात्र लगाइन्छ र औंला वा ब्रसको सहयोगले बिस्तारै किनारासम्म फैलाइन्छ। यसरी गर्दा ओठको बाहिरी रेखा स्पष्ट देखिँदैन, बरु हल्का धुम्मिएको प्राकृतिक प्रभाव प्रस्तुत हुन्छ। यो शैली विशेष गरी दैनिक प्रयोगका लागि उपयुक्त हुन्छ। धेरै मेकअप नगरी पनि अनुहार ताजा, कोमल र स्वाभाविक देखाउन चाहनेहरूका लागि ब्लर लिप्स उत्कृष्ट विकल्प हो।
केही वर्षसम्म म्याट लिपस्टिक लोकप्रिय भए पनि अहिले फेरि ग्लोसी लुक फर्किएको छ। विशेष गरी ‘भिनाइल फिनिस’ अर्थात् धेरै चम्किलो देखिने लिप्स सामाजिक सञ्जालमा धेरै देखिन थालेका छन्। यसका लागि आफूले रोजेको न्यूड वा बोल्ड लिपस्टिक लगाएर त्यसमाथि पारदर्शी लिप ग्लसको हल्का तह थपिन्छ। यसले ओठलाई चम्किलो, रसिलो र स्वस्थ देखाउँछ। गर्मीयाम, क्याजुअल भेटघाट वा हल्का मेकअपका लागि यो शैली धेरैले रुचाइरहेका छन्। ९० को दशकका ब्राउन न्यूड शेडहरू फेसनमा पुराना ट्रेन्ड पुन: फर्किने क्रम अहिले पनि जारी छ। यस वर्ष १९९० को दशकमा लोकप्रिय भएका चकलेट ब्राउन, क्यारामेल न्यूड, टेराकोटा र मोक्का शेडका लिपस्टिक फेरि चर्चामा छन। यी रङहरू धेरै छालाको रङसँग सजिलै मेल खान्छन्। अफिस, औपचारिक कार्यक्रम वा नो मेकअप लुक रोज्नेहरूका लागि यी शेडहरू उपयुक्त मानिन्छन्। धेरै गाढा नदेखिने र अनुहार निखार्ने भएकाले यस्ता रङहरूको प्रयोग दिनप्रतिदिन बढ्दो छ।
रातो लिपस्टिक फेसनबाट कहिल्यै बाहिर जान्दैन। तर यस वर्ष यसको प्रयोग गर्ने तरिका केही फरक देखिएको छ। अहिले अनुहारमा हल्का बेस मेकअप, थोरै मास्कारा वा आइलाइनर लगाएर त्यससँग चम्किलो चेरी रेड वा वाइन रेड लिपस्टिक लगाउने शैली लोकप्रिय छ। यसले अनुहारलाई अत्यधिक मेकअप नगरी पनि आकर्षक, आत्मविश्वासी र ग्ल्यामरस देखाउँछ। विशेष अवसर, औपचारिक कार्यक्रम वा साँझको भेटघाटका लागि यो शैली धेरैले रोजिरहेका छन्।
