प्रधानमन्त्री वालेन्द्र शाह ‘बालेन’ले सुनसरीसहितका केही जिल्लामा देखिएको साम्प्रदायिक तनाव तुरुन्त अन्त्य गर्न सबै पक्षलाई पहल गर्न अनुरोध गर्नुभएको छ। उहाँले बिहीबार देशवासीका नाममा गरेको सम्बोधनमा भने, “हाम्रो इतिहास प्रमाण हो- सबैभन्दा कठिन र अप्ठ्यारो परिस्थितिमा पनि आपसी एकता, सहिष्णुता र विवेक हाम्रो सबैभन्दा ठूलो शक्ति बनेका छन्।” प्रधानमन्त्रीले सबैलाई जिम्मेवार नागरिक भएर अशान्तिको बादल हटाउन आग्रह गर्नुभयो।
उहाँले भने, “सरकारले प्रत्येक नागरिकको जीवन रक्षाको लागि सबै संयन्त्रहरू सक्रिय राख्नेछ र सद्भाव बिगार्न खोज्ने कुनै पनि तत्वलाई कानुनी कारबाहीमा ल्याउनेछ।” प्रधानमन्त्रीले राष्ट्रिय सुरक्षा परिषद्को बैठकमा देशको शान्ति सुरक्षाको अवस्था गम्भीर रूपमा समीक्षा गरिएको जानकारी दिनुभयो। सुनसरीको देवानगन्ज गाउँपालिका अन्तर्गत कप्तानगञ्जमा आइतबार राति दुई धार्मिक समुदायका युवाबीच तनाव देखिएको थियो, जसमा एक जनाको मृत्यु भएको र केही घाइते भएका थिए।
सिराहा र धनुषामा कर्फ्यु आदेश जारी गरिएको र पर्सामा निषेधाज्ञा लागू गरिएको छ। प्रधानमन्त्रीले घटनामा मानवीय क्षतिप्रति दुःख व्यक्त गर्दै भने, “सामाजिक सञ्जालमा अनावश्यक अफवाह र घृणा फैलाउने अभिव्यक्ति नगर्न अनुरोध गर्दछु।” उहाँले नेपाल सरकारको सक्रियता र छानबिनको निष्पक्षता सुनिश्चित गर्ने प्रतिबद्धता व्यक्त गर्नुभयो।
राष्ट्रपति रामचन्द्र पौडेलले पनि विषम परिस्थितिमा शान्ति कायम राख्न अपिल गर्दै भने, “समुदायमा एकता, सद्भाव, मित्रता र सहिष्णुता कायम राख्न म सबैलाई हार्दिक अपिल गर्दछु।” पूर्वराष्ट्रपति विद्यादेवी भण्डारी र पूर्वराजा ज्ञानेन्द्र शाहले पनि सामाजिक सद्भाव र राष्ट्रिय एकताको आवश्यकता औंल्याएका छन्।
