काठमाडौं। पूर्वप्रधानमन्त्री तथा नेपाली कांग्रेसका पूर्व सभापति शेरबहादुर देउवाले तराईका विभिन्न जिल्लामा भएका घटनाप्रति गम्भीर ध्यानाकर्षण व्यक्त गर्नुभएको छ। हङकङमा उपचार गराइरहेका देउवाले सामाजिक सञ्जाल फेसबुकमार्फत नेपालका मानिसहरूको विशेषता भनेको एकअर्काको सहअस्तित्व स्वीकार गर्दै सद्भाव कायम राख्नु भएको बताउनुभएको छ।
‘केही दिनदेखि तराईका विभिन्न क्षेत्रमा भएका घटनाप्रति मेरो गम्भीर ध्यानाकर्षण छ। हामी नेपालीहरूको मुख्य विशेषता भनेको एकअर्काको सहअस्तित्व स्वीकार गर्दै आपसी सद्भाव, एकता र सहकार्य कायम राख्नु हो,’ उहाँले भन्नुभएको छ, ‘म सम्पूर्ण दाजुभाइ तथा दिदीबहिनीहरूलाई सामाजिक सद्भाव कायम गर्दै सहकार्य, एकता र शान्ति कायम राख्न हार्दिक अनुरोध गर्दछु।’
देउवाले थप हिंसा फैलिन नदिन सरकारले सबै राजनीतिक दलसँग सहकार्य गर्दै तत्काल आवश्यक पहल र प्रभावकारी कदम चाल्न आग्रह गर्नुभएको छ। ‘यस घटनामा निधन भएकाहरूलाई हार्दिक श्रद्धाञ्जली अर्पण गर्दछु र शोकसन्तप्त परिवारप्रति गहिरो समवेदना प्रकट गर्दछु। साथै घाइ्ताहरूको शीघ्र स्वास्थ्य लाभको कामना गर्दछु,’ उहाँले भन्नुभयो, ‘थप हिंसा नफैलियोस् भनी सरकारले धेरै राजनीतिक दलसँग सहकार्य गरी तत्काल आवश्यक पहल र प्रभावकारी कदम चाल्न अनुरोध गर्दछु।’
