प्रधानमन्त्री बालेन शाहले राष्ट्रका नाममा सम्बोधन गर्दा लगाएको कालो ब्यान्ड वास्तवमा स्वास्थ्य निगरानी गर्ने ‘हुप’ नामक अत्याधुनिक स्मार्ट वेयरेबल उपकरण हो। १५ साउन, काठमाडौं। बिहीबार प्रधानमन्त्री बालेन शाहले राष्ट्रका नाममा सम्बोधन गर्दा बायाँ हातमा लगाएको कालो ब्यान्डले सर्वसाधारणको ध्यान खिच्यो। सामाजिक सञ्जालमा कतिपयले यसलाई तराईमा भएको घटनाको शोकमा प्रदर्शन गरेको भनेर व्याख्या गरे भने कतिपयले यसलाई कालो फेटा भएको रूपमा हेरे। तर वास्तवमा त्यो स्वास्थ्य निगरानी गर्ने अत्याधुनिक स्मार्ट उपकरण (हुप–फिटबिट) हो जसले प्रयोगकर्ताको शरीरका जैविक संकेतहरू २४ घण्टा निरन्तर मापन गर्दछ। यसले स्वास्थ्य, व्यायाम, निद्रा, तनाव र शरीरको पुनःस्थापना अवस्थाबारे निरन्तर जानकारी दिन्छ।
प्रविधिको तीव्र विकाससँगै मानव स्वास्थ्यको निगरानी गर्ने तरिका पनि परिवर्तन हुँदैछ। केही वर्षअघिसम्म रक्तचाप, मुटुको धड्कन वा स्वास्थ्य परीक्षणका लागि अस्पताल जानुपर्ने हुन्थ्यो, अहिले शरीरमा लगाउने साना उपकरणले दिनभर शरीरका जैविक संकेतहरू सङ्कलन गरेर प्रयोगकर्तालाई आफ्नो स्वास्थ्यको विस्तृत जानकारी दिइरहेका छन्। यस्ता उपकरणलाई ‘स्मार्ट वेयरेबल’ भनिन्छ। स्मार्ट घडी, फिटनेस ब्यान्ड र स्वास्थ्य ट्रयाकरमध्ये विश्वभर सबैभन्दा चर्चित हुप र फिटबिट हुन्। यी उपकरणहरूले स्वास्थ्यसम्बन्धी तथ्यांक संकलन गर्नका साथै कृत्रिम बुद्धिमत्ताको माध्यमले तथ्यांक विश्लेषण गरी व्यक्तिगत स्वास्थ्य सुझाव पनि दिन्छन्।
हुप स्क्रिन नभएको स्वास्थ्य र तन्दुरुस्ती निगरानी गर्ने स्मार्ट उपकरण हो। यसले समय हेर्न, फोन कल उठाउन वा सन्देश पढ्न सकिँदैन। यसको मुख्य उद्देश्य शरीरको अवस्था बुझेर प्रयोगकर्तालाई स्वस्थ जीवनशैली अपनाउन सहयोग गर्नु हो। यसलाई सामान्यतया नाडीमा लगाइन्छ र आवश्यक परे विशेष प्रकारका पहिरनभित्र पनि प्रयोग गर्न सकिन्छ। हुप हाल विश्वका व्यावसायिक खेलाडी, ओलम्पियन, धावक, साइकल चालक, जिम प्रशिक्षक तथा स्वास्थ्यप्रति सचेत व्यक्तिहरूले प्रयोग गरिरहेका छन्। उनीहरूको प्रशिक्षण तालिका, आरामको समय र शारीरिक क्षमता व्यवस्थापनमा यो उपकरण उपयोगी साबित भएको छ।
