उत्तर कोरियाली नेता किम जङ अनबारे धेरै कुरा रहस्यमय छन्। त्यसमध्ये पनि उनकी आमाबारेको रहस्य सबैभन्दा आश्चर्यजनक देखिन्छ। आफ्नो १५ वर्षे शासनकालमा उनले एकपटक पनि आमाबारे सार्वजनिक रूपमा केही बोलेका छैनन्। वंशका कारण प्राप्त तानाशाहीको वैधता “माउन्ट पेक्टु” वंशमा टिकेको देखिन्छ – यस वंशको नाम कोरियाली प्रायद्वीपको सबैभन्दा अग्लो पहाडबाट आएको हो। यो ठाउँ कोरियालीहरूको मिथकीय जन्मस्थान मानिन्छ। यही स्थान हो जहाँ राष्ट्रपिता मानिने किम इल सुङले जापानी उपनिवेशवादीहरू विरुद्ध गुरिल्ला गतिविधि गरेका थिए।
सत्ताका दुई प्रमुख व्यक्तिका आमाहरू – राष्ट्रपिता किम इल सङकी आमा काङ पान सक र किम जङ इलकी आमा किम जङ सक – दुवैलाई कोरियाको आमाहरूको रूपमा सम्मान गरिन्छ। तर वर्तमान सर्वोच्च नेता किम जङ अनकी आमा को योङ हुई भने प्रायः गुमनाम छिन्। उनको नाम वा सम्मान कतै उल्लेखित छैन। को योङ हुईको गुमनाम हुनुको मुख्य कारण कोरियाली समाजमा विद्यमान सामाजिक धारणामा दागी मानिने वर्गबाट हुनुलाई मानिन्छ।
जीवनी लेखकहरूले सङ्कलन गरेका विभिन्न जानकारी अनुसार, उनकी आमाको जन्म सन् १९५२ मा जापानको ओसाका शहरमा भएको थियो। उनका माता-पिता मुख्यत: जेजु टापुमा बस्ने थिए, जुन अहिले दक्षिण कोरियामा पर्दछ तर पहिले उत्तरको शत्रुराष्ट्र थियो। को परिवार “जाइनिची कोरियाली” थियो, जसले जापानी औपनिवेशिक शासनकालमा सन् १९१० देखि १९४५ सम्म जापानमा बसोबास गरेको थियो। उत्तर कोरिया एक सामाजिक मर्यादाक्रमलाई महत्त्व दिने देश हो, जुन कतिपय विश्लेषकको दृष्टिमा जात प्रणाली जस्तै जेलिएको छ।
विश्लेषकहरू भन्छन् कि आफ्ना आमाबाबु र अग्रजप्रति सम्मान गर्नु पर्ने कन्फ्युसियन कालको अवधारणा त्यहाँका मानिसहरूलाई अझै सिखाइन्छ। किम जङ अनका बाबुआमाबारे विद्यमान गोपनीयताका कारण हुनसक्छ उनले आफ्नी पत्नी रि सोल जु लाई आफ्ना शासनको सुरुवाततिरै सार्वजनिक रूपमा अगाडि ल्याएका छन् र आफ्नी किशोरी छोरी जु ऐलाई भावी उत्तराधिकारीका रूपमा हुर्काइरहेका छन् भनी विश्लेषक चेओङको तर्क छ।
