बजारमा अचानक खाना पकाउने ग्यासको अभाव देखिएपछि नेपाल आयल निगमले शनिबारदेखि टेकुमा खुद्रा ग्यास वितरण सुरु गरेको छ। तर, भारतबाट ‘नियमित आपूर्ति भइरहेकै’ अवस्थामा ग्यास अभाव किन देखियो? नेपाल आयल निगमका प्रवक्ता मनोजकुमार ठाकुरका अनुसार आधा सिलिन्डरबाट पूर्ण सिलिन्डर अर्थात् १४.२ किलो ग्यास वितरण सुरु भएसँगै बजारमा ग्यासको अभाव देखिएको छ। “पहिले ७.१ किलो ग्यास वितरण हुँदा बजारमा पर्याप्त आपूर्ति भएको थियो,” ठाकुरले भने। “तर पूर्ण सिलिन्डरमा जानेबित्तिकै बजारमा अचानक झट्का परेको छ,” उनले थपे।
भारतीय आयल निगमले आवश्यक ग्यास आपूर्ति गर्ने सुनिश्चितता दिएपछि मात्र नेपाल आयल निगमले पूर्ण सिलिन्डर ग्यास वितरण गर्ने निर्णय गरेको प्रवक्ताले बताए। त्यसै कारण अहिलेको अभाव लामो समय रहने छैन भन्ने निगमको दाबी छ। ग्यास उद्योग संघले पनि पहिले आधा सिलिन्डर बिक्री हुँदा पर्खिरहेका ग्राहकहरूले पूर्ण सिलिन्डर पाइँ थालेपछि एकैपटक ग्यास भर्न आएपछि माग पूरा गर्न सक्न नसकेको बताएका छन्।
आयल निगमले पूर्ण सिलिन्डर ग्यास लिन पर्खिरहेका ग्राहक एकैपटक ग्यास लिन आउँदा बजारमा अभाव देखिएको जनाएको छ। “यो बजारमा अचानक माग बढेको झट्का हो। पूर्ण चक्र पुरा भएपछि १० देखि १२ दिनभित्र स्थिति सहज हुन्छ,” निगमका प्रवक्ता ठाकुरले बताए। नेपाल ग्यास उद्योग संघका उपाध्यक्ष धर्मराज बर्तौलाले पनि एकैपटक धेरै मानिसहरूले ग्यास किन्दा यस्तो अभाव देखिएको तर अहिले निगमको पनि केही कमजोरी रहेको जनाए।
नेपालमा दैनिक ९० देखि ९५ बुलेट ग्यासको माग रहेको छ, जो नेपाल आयल निगमका अधिकारीहरूले बताएका छन्। अहिलेको अभाव हटाउन भारतका इन्धन केन्द्रहरूमा दैनिक १०० भन्दा बढी बुलेटहरू लोड भइरहेको ठाकुरले बताए। यी बुलेटहरू नेपाल आएर उद्योग मार्फत सिलिन्डरमा ग्यास भर्न सुरु गर्न करिब एक साताको समय लाग्ने जनाइएको छ।
