बिहारको बाँकीपुर विधानसभा उपचुनावमा जन सुराज पार्टीका संस्थापक प्रशान्त किशोरले भाजपाका उम्मेदवार नीरज कुमारलाई १९,२४६ भोटको फराकिलो अन्तरले पराजित गरेका छन्। विद्यार्थी आन्दोलनको प्रभाव, भाजपाको कमजोर उम्मेदवार चयन र किशोरको व्यक्तिगत छविले भाजपाको गढ मानिएको क्षेत्रमा उनको विजयलाई निर्णायक बनाएको विश्लेषकहरूले बताएका छन्। जितपछि किशोरले भने, ‘मेरो विधायक बन्दैमा बाँकीपुर रातोरात बेङ्गलोर त बन्दैन, तर तपाईंहरूले आगामी दुई-तीन महिनामै यहाँ केही सुधार पक्कै देख्नुहुनेछ।’ १८ साउन, काठमाडौं।
बिहारको बाँकीपुर सिटमा जन सुराज पार्टीका संस्थापक प्रशान्त किशोर (पीके) ले शानदार जित हासिल गरेका छन्। चुनावी रणनीतिकारबाट राजनीतिज्ञ बनेका प्रशान्त किशोरले आफ्नो पहिलो चुनावी परीक्षामै ठूलो सफलता हात पारेका छन्। उनले बिहारको बाँकीपुर विधानसभा सिटमा भाजपाका उम्मेदवार नीरज कुमारलाई १९,२४६ भोटको फराकिलो अन्तरले पराजित गरेका हुन्। भाजपाको बलियो गढ मानिँदै आइएको यो क्षेत्रमा किशोरले कुल ६३,९४६ भोट प्राप्त गर्दा उनका निकटतम प्रतिद्वन्द्वी भाजपाका नीरज कुमारले ४४,७०० भोट मात्रै पाए।
के यो जेनजी आन्दोलनको प्रभाव हो? चुनावी नतिजा भर्खरै आएको सन्दर्भमा यसबारे पर्याप्त विश्लेषणहरू भइसकेको छैन। भारतीय विश्लेषकहरूले यो चुनावी नतिजाबारे प्रारम्भिक प्रतिक्रिया दिंदै यसलाई भारतमा अघिल्लो साता भएको जेनजी तथा विद्यार्थी आन्दोलनको प्रभावसँग जोडेका छन्। यसलाई प्रमुख कारण मानिए पनि कतिपयले यही एउटै कारणले किशोरको जितलाई विश्लेषण गर्न नहुने मत पनि राखेका छन्। भारतमा नीट परीक्षाको प्रश्नपत्र चुहावट, बारम्बार रद्द हुने भर्ती तथा प्रवेश परीक्षा, बेरोजगारी र परीक्षा प्रणालीप्रतिको अविश्वासलाई लिएर ठूलो विद्यार्थी आन्दोलन भएको थियो।
किशोरले यी मुद्दा निरन्तर उठाउँदै सरकारविरोधी विद्यार्थी असन्तोषलाई आफ्नो चुनावी अभियानसँग जोडेका थिए। तर उमेरअनुसार कसले कसलाई मत दियो भन्ने आधिकारिक मतदान तथ्यांक वा विश्वसनीय एक्जिट पोल सार्वजनिक भएको छैन। यद्यपि, जेनजी आन्दोलनले भाजपाविरोधी वातावरण तयार गर्यो र किशोर त्यस वातावरणलाई मतमा रूपान्तरण गर्न सफल भए भन्न सकिन्छ।
