बंगलादेशको विदेश मन्त्रालयले भारतमा अपदस्थ पूर्वप्रधानमन्त्री शेख हसिनालाई मिडियासँग अन्तर्वार्ता दिने अनुमति दिइएकोमा गहिरो विरोध जनाएको छ। बंगलादेशले हसिनालाई राष्ट्रियता विरुद्धको अपराधमा दोषी ठहर गर्दै भारत सरकारलाई प्रत्यर्पणको लागि बारम्बार अनुरोध गरिरहेको छ, तर कुनै प्रतिक्रिया आएको छैन। पूर्वप्रधानमन्त्री हसिनाले भर्चुअल माध्यमबाट आगामी डिसेम्बरमा स्वदेश फर्कने र कानुनी परिणामहरू सामना गर्न तयार रहेको घोषणा गरेकी छन्।
बंगलादेशले अपदस्थ पूर्वप्रधानमन्त्री शेख हसिनाको बुधबार नयाँ दिल्लीमा मिडिया सँग प्रत्यक्ष कुराकानी गरेको विषयमा कडा आपत्ति जनाएको छ। हसिनालाई बंगलादेशको राष्ट्रियता र जनताको विरुद्ध सामूहिक अपराध गरेको आरोप लगाइएको छ। बुधबार जारी गरेको प्रेस वक्तव्यमा बंगलादेशको विदेश मन्त्रालयले फरार दोषी नरसंहारकर्ता शेख हसिनालाई नयाँ दिल्लीमा मिडियासँग प्रत्यक्ष संवाद गर्ने अनुमति दिइएकोमा गहिरो असन्तुष्टि व्यक्त गरेको छ।
विदेश मन्त्रालयले उल्लेख गरेको छ कि बंगलादेशका जनता जुलाई क्रान्तिको दोस्रो वार्षिकोत्सव मनाइरहेका बेला भारतीय भूमिमा शेख हसिनाको संवादले बंगलादेशको सार्वभौमत्व र जुलाई क्रान्तिका शहीदहरूको गम्भीर अपमान भएको छ। सन् २०२४ को जुलाई अगस्ट महिनामा हसिनाले गरेको निर्दोष नागरिकहरू र नाबालिकाहरूसहितको विभत्स हत्याकाण्डलाई संयुक्त राष्ट्रसंघद्वारा स्थापन तथ्यहरूको अस्वीकार गर्नु र फरार दोषी सामूहिक हत्याराको पुनः सक्रियता इतिहासलाई उल्ट्याउन लागिएको मन्त्रालयले जनाएको छ।
मन्त्रालयले दोषी ‘सामूहिक हत्यारा’ हसिना र उनका सहयोगीहरूलाई बंगलादेशको राजनीतिमा कहिल्यै स्थान नदिनुपर्ने बताएको छ। विज्ञप्तिमा बंगलादेश भारतसँग सार्वभौम समानता, आपसी सम्मान, आन्तरिक मामिलामा हस्तक्षेप नगर्ने र राष्ट्रिय मर्यादाको आधारमा रचनात्मक, पारस्परिक रुपमा लाभदायक तथा प्रगतिशील सम्बन्ध कायम गर्न चाहन्छ भन्ने उल्लेख गरिएको छ। तर सन् २०१३ मा दुई देश बीच भएको प्रत्यर्पण सन्धिअनुसार दोषी हसिनालाई बंगलादेश फिर्ता गर्न बारम्बार अनुरोध गर्दा पनि भारत सरकारले अहिलेसम्म कुनै जवाफ नदिएको बताइएको छ।
