शिक्षा तथा खेलकुद मन्त्री सस्मित पोखरेलले अखिल नेपाल फुटबल संघ (एन्फा) को निलम्बन फुकुवाका लागि सकारात्मक पहल भइरहेको जानकारी दिएका छन्। राष्ट्रिय खेलकुद परिषद्को १२५औं बोर्ड बैठकमा मन्त्री पोखरेलले फिफासँग निरन्तर संवाद भइरहेको बताएका छन्। २८ साउन, काठमाडौं।
मन्त्री पोखरेलले भने, “हामी बीच सहकार्य भइराखेको छ। छलफल भइराखेको छ। विभिन्न प्रकारका पत्राचार पनि भइरहेको छ। छलफल सकारात्मक छ। निलम्बन चाँडै फुकुवा हुने आशा गर्न सकिन्छ।” एन्फाको विषय बैठकको एजेन्डामा राखिए पनि कुनै निर्णय भइसकेको छैन।
स्रोतका अनुसार, सरकार अहिले फिफाबाट जवाफको प्रतीक्षामा छ। “हाम्रो पक्षबाट निर्णय तयार भइसकेको छ। अहिले फिफाको जवाफको प्रतीक्षामा छौं। जवाफ आएपछि सरकार अगाडि बढ्नेछ,” स्रोतले बताएको छ।
