लामो विवादपछि फसिरहेको नेपाली कांग्रेसभित्र पूर्वसभापति शेरबहादुर देउवा बिहीबार स्वदेश फर्किएपछि नयाँ हलचल देखा परेको छ। संस्थापन इतर पक्षले शुक्रबार आयोजना गर्न लागेको राष्ट्रिय भेलामा उनी सहभागी हुने नेताहरूले बताएका छन्। देउवालाई हटाएर गठन गरेको कांग्रेस केन्द्रीय समितिको बैठकले “हार्दिक स्वागत र पूर्ण स्वास्थ्यलाभको कामना” गरेको छ। “पार्टी र देशमा विधि र पद्धति स्थापना गर्न लामो संघर्ष गरेका” भन्दै बैठकले देउवाको योगदानप्रति कृतज्ञता दर्शाएको छ र अभिभावकीय भूमिका निभाउन अपेक्षा गरेको छ। “कांग्रेसको गौरवपूर्ण इतिहास निर्माणमा उहाँको भूमिका र लोकतान्त्रिक आन्दोलनमा गरेको नेतृत्वप्रति हार्दिक सम्मान प्रकट गर्दछ,” विज्ञप्तिमा भनिएको छ, “निवर्तमान सभापतिका रूपमा अभिभावकीय भूमिका निर्वाह गर्नुहुने छ भन्ने यो बैठक पूर्ण विश्वास गर्दछ।”
शेरबहादुर देउवालाई स्वागत गर्न विमानस्थलमा देखिएको नेता तथा कार्यकर्ताको भीडलाई उनीनिकट नेताहरूले विशेष महत्वसाथ हेरेको पाइन्छ। प्रधानमन्त्री हुँदा देउवाका प्रेस सल्लाहकार गोविन्द परियारले भने, “कुनै नेता विदेशबाट फर्किंदा त्यति ठूलो भिडले कहिले स्वागत गरेको थिएन।” उनले यसले कांग्रेस मात्रै होइन, राष्ट्रिय राजनीतिमा पनि मेलमिलापको सन्देश दिएको बताए। “म नेता भएर होइन, यो महान राष्ट्रको आजीवन नागरिक भएर फर्केको छु- विनम्रता, समर्पण र प्रेमसहित सेवा गर्न तत्पर छु,” देउवाले भनेका छन्। तर उनीनिकट नेताहरू उनलाई शक्तिकेन्द्रकै रूपमा अघि सार्ने चेष्टा गर्दै छन्।
नेता प्रकाशशरण महत भन्छन्, अब १४ औँ महाधिवेशनबाट आएको नेतृत्वमा १५ औँ महाधिवेशन गरी कांग्रेस एक बनाउन सकिन्छ। महाधिवेशन आयोजक समिति बनाउन मिलापको विकल्प उत्तम होला। “त्यसमध्ये विशेष महाधिवेशन पक्षका साथीहरू पनि छन्, त्यसले राष्ट्रिय चुनौतीलाई सामना गर्न सक्ने पार्टी बनाउनेछ, नयाँ उत्साह ल्याउनेछ,” उनले भने, “शेरबहादुरजी नेतृत्वमा आउने होइनन्, त्यसैले त्यो नै कांग्रेसको ठूलो एकताको उपयुक्त बाटो हो।” यसअघि इतर पक्षका नेताहरूले विशेष महाधिवेशन नेतृत्व स्वीकार गर्दा १४ औँ महाधिवेशनबाट आएका नेताहरूलाई समेटेर आयोजक समिति बनाउने कुरा मान्य हुने संकेत गरेका थिए।
