सञ्चारमन्त्रीद्वारा दूरसञ्चार सेवा विस्तार र गुणस्तर सुधारमा विशेष ध्यान दिन निर्देशन
सञ्चारमन्त्री डा. विक्रम तिमिल्सिनाले दूरसञ्चार सेवाको गुणस्तर सुधार र पहुँच विस्तारलाई प्राथमिकता दिँदै परिणाममुखी काम गर्न सम्बन्धित निकायहरूलाई निर्देशन दिएका छन्। उनले दुर्गम क्षेत्रका नागरिकलाई सञ्चार सेवासँग जोड्नु राज्यको प्रमुख दायित्व भएको उल्लेख गर्दै ग्रामीण दूरसञ्चार विकास कोष (आरटीडीएफ) कोषको रकमको प्रभावकारी प्रयोगमा जोड दिए।
नेपाल टेलिकमका प्रबन्ध निर्देशक संगिता पहाडिले दुर्गम क्षेत्रमा सेवा विस्तारका लागि थप फ्रिक्वेन्सी र आरटीडीएफको सहयोग आवश्यक रहेको बताइन्। मन्त्री तिमिल्सिनाले टेलिफोन तथा इन्टरनेट सेवामा कमजोरۍको गुनासो निरन्तर नागरिकबाट आइरहेको भन्दै सेवा विस्तार र गुणस्तर सुधारमा नियामक संस्थाहरू र सेवा प्रदायकहरूले गम्भीरतापूर्वक परिणाममुखी काम गर्नुपर्ने बताए।
सञ्चारमन्त्री तिमिल्सिनाले दुर्गम क्षेत्रसहित कतिपय शहरी क्षेत्रमा पनि नागरिकले टेलिफोन तथा इन्टरनेट राम्रो सुविधा पाउन नसकेको तर अर्कोतर्फ ग्रामीण दूरसञ्चार विकासका लागि संकलन भैरहेको आरटीडीएफ कोष प्रभावकारी रूपमा खर्च हुन नसकेको जानकारी दिए। उनले नेपाल टेलिकमलाई सेवा विस्तार तथा गुणस्तर सुधारका लागि स्पष्ट व्यावसायिक योजना बनाई अघि बढ्न निर्देशन दिए।
नेपाल दूरसञ्चार प्राधिकरणका अध्यक्ष अर्जुन घिमिरेले आरटीडीएफ कोष प्रयोग गरी सेवा विस्तारका लागि प्राधिकरणले लामो समयदेखि काम गरिरहेको भए पनि कतिपय आयोजना अझै पूर्ण रूपमा सम्पन्न हुन नसकेको भने। नेपाल टेलिकमले यस आर्थिक वर्षमा करिब एक हजार किलोमिटर अप्टिकल फाइबर विस्तार गर्ने लक्ष्य राखेको छ।
