एभरेस्ट वुमन्स भलिबल लिगको तेस्रो संस्करण आगामी असोज १५ देखि २४ गतेसम्म काठमाडौंको दशरथ रंगशाला कभरहलमा आयोजना गरिने भएको छ। नेपाल भलिबल संघले प्रतियोगिताका लागि आधिकारिक स्वीकृति दिएको छ र आयोजकले तयारी औपचारिक रूपमा अघि बढाएको छ। महिला भलिबलको विकास र खेलाडीको क्षमता अभिवृद्धि गर्ने उद्देश्यले अघिल्ला संस्करणभन्दा अझ भव्य र व्यवस्थित रुपमा लिग सञ्चालन गरिने तयारी छ।
आयोजकले तेस्रो संस्करणको औपचारिक मिति घोषणा गर्दै प्रतियोगिता अक्टोबर १ देखि १० अर्थात् असोज १५ देखि २४ गतेसम्म सञ्चालन गरिने जानकारी दिएका छन्। नेपाल भलिबल संघले पनि प्रतियोगिताको मितिलाई आधिकारिक स्वीकृति प्रदान गरेको छ। स्वीकृतिसँगै लिगको तेस्रो संस्करणका लागि आवश्यक तयारी औपचारिक रूपमा अघि बढाइँदैछ।
अघिल्ला दुई संस्करणको सफलतापछि र बढ्दो लोकप्रियतालाई मध्यनजर गर्दै तेस्रो संस्करणलाई अझ भव्य, प्रतिस्पर्धात्मक र व्यवस्थित बनाउने तयारी गरिएको छ। लिगले महिला भलिबल खेलाडीहरूलाई उच्चस्तरीय प्रतिस्पर्धा प्रदान गर्दै नेपालमा महिला भलिबलको विकास र खेलाडीहरूको क्षमता अभिवृद्धिमा योगदान दिने लक्ष्य राखेको छ। यसअघि शुक्रबार पुरुष फ्रेन्चाइज भलिबल लिग नेपाल भलिबल लिग (एनभीएल) को मिति पनि सार्वजनिक भएको थियो, जसअनुसार एनभीएल भदौ १९ देखि २७ सम्म आयोजना हुनेछ।
