बायर्न म्युनिखका जर्मन मिडफिल्डर जमाल मुसियालाले चार दिनको अन्तरालमा दोस्रो पटक खेलको क्रममा अचानक बेहोरेका छन्। मुसियालाले सामाजिक सञ्जालमार्फत आफूलाई अस्थायी रुपमा छोटो समयका लागि रहने ‘एब्सेन्स सिजर’ लागेको र उपचार भइरहेको जानकारी दिएका छन्। बायर्नका खेल निर्देशक म्याक्स एबर्लले क्लबलाई मुसियालाको अवस्था पहिले नै थाहा भएको बताए। ३ भदौ, काठमाडौं।
मंगलबार हाइडेनहाइमविरुद्धको मैत्रीपूर्ण खेलमा मैदान प्रवेश गर्दै केही मिनेटमै उनी अचानक ढलेका थिए र चिकित्सकीय टोलीले मैदानमै उपचार गरेको थियो। २३ वर्षीय मुसियाला यसअघि शनिबार आरबी लाइपजिगविरुद्धको मैत्रीपूर्ण खेलमा पनि खेलकै क्रममा बेहोरेका थिए। लगातार दोस्रो घटना भएपछि उनले आफूमा ‘न्युरोलोजिकल डिसफङ्सन’ देखिएको र उपचार भइरहेको जानकारी दिएका छन्।
मुसियालाले सामाजिक सञ्जालमार्फत आफूलाई अस्थायी र छोटो समय रहने ‘एब्सेन्स सिजर’ भएको बताएका छन्। उनका अनुसार यो समस्या उपचारयोग्य छ। उनले भने, “पहिलो दृष्टिमा यी घटना डरलाग्दा देखिन सक्छन्, तर अहिलेका लागि यो मेरो दैनिक जीवनको एउटा हिस्सा मात्रै हो।” उनी राम्रो चिकित्सकीय उपचार पाइरहेका छन् र भविष्यप्रति आशावादी रहेको बताए। बायर्न क्लब, परिवार र साथीहरुद्वारा निरन्तर साथ र सहयोग मिलिरहेको पनि उनले जनाए।
मंगलबारको खेलपछि बायर्नका खेल निर्देशक म्याक्स एबर्लले क्लबलाई मुसियालाको अवस्था बारे पहिले नै जानकारी भएको बताएका थिए। मुसियाला गत वर्षको क्लब विश्वकपका क्रममा खुट्टाको हड्डी भाँचिएपछि करिब ६ महिना मैदानबाहिर रहेका थिए। पुनरागमनपछि उनी २०२६ को विश्वकपमा जर्मनीका चार मध्ये तीन खेल सुरुवाती टोलीबाट खेलेका थिए।
