डोनाल्ड ट्रम्पको दावी: स्ट्रेट अफ होर्मुज ‘अमेरिकाले नयाँ भूभाग’ घोषणा गर्यो

डोनाल्ड ट्रम्पले स्ट्रेट अफ होर्मुजलाई ‘अमेरिकाको नयाँ भूभाग’ भनेर दावी गरि एक नक्सा सार्वजनिक गरेका छन्। तर इरानले ट्रम्पको यस दावीलाई अस्वीकार गर्दै होर्मुज जलडमरूमध्ये आफ्नो नियन्त्रण कायम रहेको बताएको छ।

सीएनएनका अनुसार पछिल्ला दुई सातामा स्ट्रेट अफ होर्मुजबाट जहाजहरुको ८० प्रतिशतभन्दा बढी आवागमन ओमानतर्फको मार्ग हुँदै भएको छ।

३ भदौ, काठमाडौं। अमेरिकी राष्ट्रपति डोनाल्ड ट्रम्पले स्ट्रेट अफ होर्मुज (होर्मुज जलडमरूमध्ये) को एउटा नक्सा सार्वजनिक गर्दै त्यसलाई आफ्नै ‘अमेरिकी भूभाग’ भनेर दावी गरेका छन्। ट्रम्पले आफ्नो सामाजिक सञ्जाल प्लेटफर्म ट्रुथ सोसलमार्फत् मंगलबार यो दावी राखेका थिए। पोस्ट गरिएको ग्राफिकमा इरान र ओमानको बीचमा रहेको होर्मुज जलडमरूमध्ये घेरिएको छ र माथि ‘नयाँ अमेरिकी भूभाग’ लेखिएको देखिन्छ। यसअघि न्यूयोर्कमा आयोजित एक कार्यक्रममा ट्रम्पले इरानलाई पराजित गरेपछि स्ट्रेट अफ होर्मुजलाई अमेरिकाको भूभाग घोषणा गर्ने योजना रहेको बताएका थिए।

तर इरानले ट्रम्पको उक्त दावीलाई अस्वीकार गर्दै स्ट्रेट अफ होर्मुजमाथि आफ्नो नियन्त्रण कडाइका साथ कायम रहेको जनाएको छ। इरानको सर्वोच्च राष्ट्रिय सुरक्षा परिषद्का प्रमुख मोहसिन रजाईले अमेरिकाले युद्ध र नाकाबन्दी अन्त्य नगरेसम्म, रोकिएका इरानी सम्पत्ति फिर्ता नगरेसम्म तथा लेबनान, गाजासहित क्षेत्रमा युद्धविरामका लागि सहमत नभएसम्म होर्मुज बन्द नै रहने बताएका छन्।

इरानले होर्मुज जलडमरूमध्ये धेरै भागमा नियन्त्रण गुमाएको भन्ने सीएनएनको दाबी छ। स्ट्रेट अफ होर्मुजमाथि नियन्त्रणका लागि जारी संघर्षले त्यस क्षेत्रलाई इरानी युद्धको प्रमुख केन्द्र बनाएको छ। पछिल्ला केही महिनायता इरान र अमेरिकाले दुवैले स्ट्रेट अफ होर्मुजमाथि आफ्नो पकड बलियो रहेको दावी गर्दै आएका छन्। यद्यपि, पछिल्लो तथ्यांकले अमेरिकी नौसेनाको सक्रिय उपस्थिति भएपनि इरानले महत्त्वपूर्ण जलमार्गमाथि आफ्नो नियन्त्रण ठूलो रुपमा गुमाउँदै गएको देखिएको छ।