अमेरिकी राष्ट्रपति डोनाल्ड ट्रम्पले इरानलाई आर्थिक सहायता गर्ने देश, कम्पनी वा संस्थाहरूलाई कडा परिणाम भोग्नुपर्ने चेतावनी दिएका छन्। उनले ट्रुथ सोसलमार्फत इरानसँग सम्बन्धित तेल तस्करी, वित्तीय कारोबार र नगद स्थानान्तरणजस्ता गतिविधिहरूमा अमेरिकी निगरानी कडा बनाइने बताएका छन्। ट्रम्पले इरानलाई सम्झौताका धेरै अवसर दिइसकेको दाबी गर्दै अब अन्तर्राष्ट्रिय आर्थिक अलगाव र थप दबाब बढाइने बताए। ४ भदौ, काठमाडौं।
ट्रम्पले इरानमाथि अहिलेसम्मकै ठूलो आर्थिक दबाब अभियान सुरु गर्ने संकेत दिँदै त्यसमा सहयोग गर्ने कुनै पनि देश, कम्पनी वा संस्थालाई छोड्ने छैनन् भनेका छन्। उनले सामाजिक सञ्जाल ‘ट्रुथ सोसल’ मार्फत इरानलाई कुनै पनि प्रकारको सहयोग गर्ने देशहरूलाई अमेरिकी कारबाहीको चेतावनी दिएका छन्। उनका अनुसार कुनै पनि देशका वित्तीय संस्था, कम्पनी, विमानस्थल वा सरकारी निकायले इरानलाई सहयोग गर्ने बाटो खुला गरे उनीहरूले ठूलो आर्थिक घाटा व्यहोर्नुपर्ने हुन सक्छ।
यद्यपि ट्रम्पले आफ्नो चेतावनीमा कुनै देशको नाम उल्लेख गरेका छैनन्। इरानलाई सहयोग गर्ने देश, कम्पनी वा वित्तीय संस्थाविरुद्ध कस्तो कारबाही गरिने भन्ने कुरा पनि उनले स्पष्ट पारेका छैनन्। ट्रम्पले इरानलाई सहयोग पुग्ने विभिन्न आर्थिक गतिविधिहरूमा अमेरिकी निगरानी केन्द्रित हुने समेत बताए। यसमा तेल तस्करी, वित्तीय कारोबार, नगद स्थानान्तरण, एक्सचेन्ज हाउस, जलजहाज दर्ता तथा अन्य कम्पनीहरूको नाममा हुने कारोबारहरू समावेश छन्।
ट्रम्पले इरानलाई सम्झौतामा आउन पटक-पटक मौका दिइसकेको दाबी गरेका छन्। तर ती अवसरहरू इरानले स्वीकार नगरेकाले अब थप आर्थिक दबाब बढाउने निर्णयमा अमेरिका पुगेको बताएका छन्। उनले अघि बढाउने अभियानलाई ‘अभूतपूर्व स्तरको आर्थिक लडाइँ’ तथा इरानको अन्तर्राष्ट्रिय आर्थिक अलगावको प्रयासका रूपमा वर्णन गरेका छन्। ट्रम्पका अनुसार इरानको अर्थतन्त्र पहिले नै कडा दबाबमा छ र थप प्रतिबन्ध तथा दबाबले इरानको अन्तर्राष्ट्रिय व्यापारलाई अझै कठिन बनाउनेछ।
