जापानको कानुमा शहरको शिन–कानुमा स्टेशनमा रेल ठक्कर हुँदा चार कर्मचारीको मृत्यु भएको अधिकारीहरूले बिहीबार पुष्टि गरेका छन्। मृतक कर्मचारीहरू ५० देखि ६० वर्ष उमेर समूहका पुरुष थिए र रेलमा सवार करिब ५० यात्रु घाइते भएका छैनन्। ती कर्मचारीहरू रेलको लिग वरपर झारपात हटाउने सात सदस्यीय टोलीका सदस्य थिए, र दुर्घटनामा ‘स्पेसिया एक्स’ एक्सप्रेस रेल संलग्न थियो।
४ भदौ, टोकियो – जापानमा रेल ठक्करबाट रेल स्टेशनका चार कर्मचारीको मृत्यु भएको आधिकारिक रिपोर्ट सार्वजनिक भएको छ। स्थानीय सञ्चार माध्यमका अनुसार, टोकियोको उत्तरमा पर्ने कानुमा शहरको शिन–कानुमा स्टेशनमा रेलको लिग वरपर झारपात हटाउने क्रममा ती कर्मचारीहरूलाई एक्सप्रेस रेलले ठक्कर दिएको थियो।
अग्नि नियन्त्रक विभागका अधिकारीहरूको भनाइ अनुसार दुर्घटनामा मृत्यु भएका चार जनाको घटना स्थलबाट उद्धार गरिएको थियो। तीन जना रेलमुनि च्यापिएका थिए भने एक जना लिगमा थिए। जिजी प्रेसले ती सबै पुरुष कर्मचारीहरू ५० देखि ६० वर्ष उमेर समूहका रहेको जनाएको छ। रेलमा सवार करिब ५० यात्रुमा कसैलाई चोटपटक लागेको छैन।
सञ्चारमाध्यमका अनुसार, दुर्घटनामा संलग्न रेल छ वटा डिब्बा भएको ‘टोबु निक्को लाइन’ मा चल्ने ‘स्पेसिया एक्स’ एक्सप्रेस रेल थियो, जसले टोकियो र तोचिगी क्षेत्रको प्रमुख पर्यटकीय गन्तव्य निक्कोलाई जोड्ने गर्दछ। रेल संचालनकर्ता अनुसार, यात्रुहरू टोकियोतर्फ जाँदै गर्दा शिन–कानुमा स्टेशनमा रोकिने क्रममा दुर्घटना भयो। यात्रुहरूले ठूलो गडगडाहटको आवाज सुने र रेल अचानक रोकिएपछि निकै तनाव महसुस गरेका थिए। केही समयसम्म यात्रुहरूले रेलभित्रै बस्न बाध्य रहेका थिए।
ती कर्मचारीहरू झारपात हटाउने कार्यमा लागेको सात सदस्यीय टोलीका सदस्य थिए। जापानी रेल सेवामा उच्च स्तरीय मर्मत, तालिम र अत्याधुनिक प्रविधिको प्रयोगका कारण यातायात सेवा सुरक्षित मानिन्छ र घातक दुर्घटनाहरू अपेक्षाकृत कम हुन्छन्।
यस शताब्दीमा जापानमा सबैभन्दा घातक रेल दुर्घटना सन् २००५ मा भएको थियो, जसमा व्यस्त समयमा यात्रुबाहक रेल लिगबाट बाहिरिएर पश्चिमी अमागासाकीको एक अपार्टमेन्ट भवनमा ठोक्किएको थियो। सो दुर्घटनामा १०७ व्यक्तिको मृत्यु र ५०० भन्दा बढी घाइते भएका थिए। सन् १९६३ मा भईएको रेल दुर्घटनामा १६१ जनाको मृत्यु भएको थियो।
सन् १९६४ मा सेवा सुरु भएदेखि जापानको ‘सिन्कान्सेन’ बुलेट रेलमा कुनै पनि लिगबाट रेल खस्ने वा ठोक्किनेजस्ता घटनाले यात्रुको मृत्यु भएको छैन।
