युक्रेनमा भएको पछिल्लो रुसी हमलामा कम्तीमा दुई जनाको मृत्यु भएको स्थानीय अधिकारीहरूले शनिबार बिहान बताएका छन्। अधिकारीहरूका अनुसार, किएभमा बलिस्टिक क्षेप्यास्त्रको चेतावनी जारी भएसँगै एउटा गोदाममा आगलागी हुँदा एक जनाको ज्यान गएको छ। त्यस्तै, जापोरिजा सहरमा भएको ड्रोन हमलामा अर्का एक जनाको मृत्यु भएको बताइएको छ।
यसअघि शुक्रवार क्रिभी री सहरस्थित एउटा व्यस्त शपिङ सेन्टरमा ‘डबल-ट्याप’ ड्रोन हमलाले १६ जनाको ज्यान लिएको थियो। उक्त घटनामा अझै नौ जना हराइरहेका छन्। सामान्यतया, प्रारम्भिक ड्रोन हमलाको केही मिनेटपछि समानै स्थानमा लक्षित गरी दोस्रो पटक गरिएको योजनाबद्ध ड्रोन हमलालाई ‘डबल-ट्याप’ ड्रोन आक्रमण भनिन्छ। शहरकै सबैभन्दा ठूलो शपिङ मलमा भएको उक्त हमलामा २३ जना बालबालिकासहित १३० जना घाइते भएका थिए।
राष्ट्रपति भोलोदिमिर जेलेन्स्कीले आफ्नो गृहनगरमा “पूर्णतः निन्दनीय र घृणित” आक्रमण “दुई चरणमा” भएको बताएका छन्। उनका अनुसार दोस्रो आक्रमणमा घटनास्थलमा उद्धार तथा आकस्मिक सेवाका कर्मचारीहरूलाई निशाना बनाइएको थियो। बीबीसीले पुष्टि गरेको भिडियो फुटेजमा डिनिप्रोपेत्रोभ्स्क क्षेत्रमा पहिले नै आगलागी भइरहेको उक्त शपिङ सेन्टरमा दोश्रो ड्रोनले प्रहार गरेको देखिन्छ। रुसी सेनाले यसबारे कुनै प्रतिक्रिया दिएको छैन।
उक्त क्षेत्रका प्रमुख ओलेक्स्यान्डर हान्साले शुक्रबार साँझ घटनामा १५ जनाको मृत्यु भएको पुष्टि गरेका थिए। मृत्यु हुनेमा अस्पतालमा उपचारको क्रममा ज्यान गुमाएका दुई जना पनि छन्। खोजी तथा उद्धारकार्य जारी रहेकै समयमा उनले आकस्मिक सेवाका कर्मचारीहरूले भग्नावशेषबाट एक जनाको शव निकालेको जानकारी दिएका छन्। उनले टेलिग्राममार्फत् जानकारी दिँदै बताएअनुसार क्रिभी री शपिङ सेन्टरमा अझै नौ जना हराइरहेका छन् र तीमध्ये दुई जना बालबालिका पनि छन्। घाइतेमध्ये १३० जनामध्ये २९ जनाको अवस्था गम्भीर रहेको बताइएको छ। मृतकको संख्या अझै बढ्न सक्ने आशंका गरिएको छ।
