ईस्पोर्ट्स एसोसिएसन अफ नेपाल र पब्जी मोबाइलको संयुक्त आयोजनामा डट्स ईस्पोर्ट्सले पीएमएनसी फल सिजनको उपाधि जितेको छ। विजेता डट्स ईस्पोर्ट्सले पुरस्कारस्वरूप ४०० अमेरिकी डलर प्राप्त गरेको छ। देशभरबाट छनोट भएका १६ टोलीबीच दशरथ रंगशालास्थित कभर्ड हलमा भदौ ६ र ७ गते फाइनल प्रतिस्पर्धा भएको थियो। ७ भदौ, काठमाडौं।
ईस्पोर्ट्स एसोसिएसन अफ नेपाल (ईशान) र पब्जी मोबाइलको संयुक्त आयोजनामा सम्पन्न पब्जी मोबाइल नेसनल च्याम्पियनसिप (पीएमएनसी) फल सिजनको उपाधि डट्स ईस्पोर्ट्सले जितेको छ। विजेता टोलीले पुरस्कार स्वरूप ४०० अमेरिकी डलर प्राप्त गरेको छ। राष्ट्रिय खेलकुद परिषद्को स्वीकृत कार्यक्रमअन्तर्गत देशभरबाट छनोट गरेका १६ टोलीले दशरथ रंगशालास्थित कभर्ड हलमा भदौ ६ र ७ गते प्रतिस्पर्धा गरेका थिए।
दुई दिने फाइनलमा उत्कृष्ट प्रदर्शन गर्दै डट्स ईस्पोर्ट्स च्याम्पियन बनेको हो। विजेता टोलीलाई शिक्षा तथा खेलकुद मन्त्री सस्मित पोखरेल तथा ईशानका कार्यवाहक अध्यक्ष हिमविक्रम केसीले ट्रफी र पुरस्कार प्रदान गरेका थिए। प्रतियोगिताबाट उत्कृष्ट १२ टोली ‘रोड टु पीएमजीओ’ अन्तर्गतको अर्को चरणमा छनोट भएका छन्। यस चरणले नेपाली टोलीलाई अन्तर्राष्ट्रिय पब्जी मोबाइल प्रतियोगितातर्फ अघि बढ्ने अवसर प्रदान गर्नेछ।
ईशानका सचिव आशिष दाहालले नेपालमा ई–स्पोर्ट्सलाई थप व्यवस्थित र प्रतिस्पर्धात्मक बनाउने उद्देश्यसहित प्रतियोगिता सफलतापूर्वक सम्पन्न भएको बताए।
