‘भूकम्पको तुलनामा बढी चुनौतीपूर्ण’: रसुवा बाढीपछि उद्धार कार्यमा कठिनाइ, तर अझै जीवित भेटिने आशा

रसुवा बाढीपछिको खोज तथा उद्धारमा खटिएका सुरक्षा निकायका अधिकारीहरूले यस कार्यलाई यसअघि भोगेको ठूलो विपद् भूकम्पको तुलनामा निकै कठिन भएको बताएका छन्। प्रमुख उद्धार कार्य बाढीले तत्काल प्रभावित बनाएको माथिल्लो भेगका रसुवा र नुवाकोट जिल्लामा केन्द्रित रहेको सुरक्षा अधिकारीहरूले बताएका छन्। हजारौँ सुरक्षाकर्मी परिचालन गरिएको छ। शनिबारसम्म कठिन अवस्थामा रहेका व्यक्तिहरूको जीवित उद्धार गरिएको र खोज तथा उद्धार गतिविधि अझै केही दिनसम्म जारी रहने जनाइएको छ।

अपर त्रिशुली जलविद्युत आयोजनाका सुरुङमा फसेका धेरै कामदारहरूलाई सेनाले हेलिकप्टर र जमिनबाट उद्धार गरेको थियो। नेपाली सेनाले आफ्नो फेसबुकमा राखेको त्यस उद्धारको भिडियोमा, घिस्रिएर र मुस्किलले हिलोमाटोले भरिएको सुरुङको मुखसम्म पुग्ने जटिल प्रयास देख्न सकिन्छ। नेपाल विद्युत् प्राधिकरणले सतबारसम्म १०४ जनालाई विभिन्न जलविद्युत् परियोजनाका सुरुङबाट उद्धार गरिएको जानकारी दिएको छ। यद्यपि आयोजनासम्बन्धी व्यक्तिहरूले अझै पनि सयौँ मानिसहरू सुरुङभित्र रहेका जानकारी दिएका छन्।

भदौ १० गतेको उक्त घटनामा परेर शनिबार साँझ ७ बजेसम्म ५७९ जनाको शव भेटिएको सरकारी विवरण छ। करिब दुई हजारजनाको सम्पर्क नभएको सङ्केत गरिएको छ। सेनाका प्रवक्ता राजाराम बस्नेतले अहिले उद्धार कार्यहरू सुरुङमा केन्द्रित रहेको जानकारी दिए। उनले भने, “एक्सकाभेटरहरू पारीएर लैजान सकिंदैन। कतिपय स्थानमा लेदो जमेकाले वास्तविक सुरुङको स्थान पत्ता लगाउन पनि कठिनाइ भइरहेको छ।” नेपाल प्रहरीका प्रवक्ता अबि नारायण काफ्लेले नदी किनारमा गरिएको खोज र उद्धार कार्य बढी केन्द्रित रहेको र त्यहाँ हिलोयुक्त बगर भएको बस्तीमा “दलदलबीच खोजी, उद्धारदेखि मुचुल्का उठाउने कार्यसम्म जटिल भएको” बताउनुभयो।

सशस्त्र प्रहरीका सहप्रवक्ता शैलेन्द्र थापाले खोजमा ‘‘सास वा लास’’का लागि तल्लो तटीय क्षेत्रमा जानुपरेको र यस्तो अवस्था यस घटनामा देखिएको बताए। करिब १५ हजार सुरक्षा जवान परिचालन गरेर खोज तथा उद्धार भइरहेको छ। नेपाली सेना, सशस्त्र प्रहरी र नेपाल प्रहरी सक्रिय छन्। स्थिति जटिल भएकोले स्थानीयवासीहरूले तालिमप्राप्त जनशक्तिविना उद्धार प्रयास गर्दा सीमित मात्रामा मात्र सहयोग पुग्ने सुरक्षा अधिकारीहरूले बताएका छन्। सशस्त्र प्रहरीका सहप्रवक्ता थापाले यस विपत्तिमा उपलब्ध सबै उद्धार जनशक्ति प्रयोग भइरहेको जानकारी दिए।