म्यान्माका राष्ट्रपति मिन आङ ह्लाइङले आसियानसँग सम्बन्ध सुधार र विदेशी लगानी आकर्षित गर्ने प्रयासस्वरूप शुक्रबार भियतनामको भ्रमण गरेका छन्। हनोईमा उनले राष्ट्रपति टो लामसहित उच्च तहका अधिकारीहरूसँग भेटवार्ता गर्ने र व्यापारिक प्यानलमा सहभागी हुने अपेक्षा गरिएको छ। भियतनाम र म्यान्माबीचको द्विपक्षीय व्यापार सन् २०२० मा ८५ करोड ३० लाख डलरबाट सन् २०२५ मा ५९ करोड डलरमा घटेको छ। १९ भदौ, बैङ्कक (रासस/एपी)।
सन् २०२१ मा सेनाले सत्ता कब्जा गरेपछि क्षेत्रीय र अन्तर्राष्ट्रिय रूपमा बढेको राजनैतिक अलगाव अन्त्य गर्ने प्रयासको रूपमा यो भ्रमणलाई हेरिएको छ। राष्ट्रपति पदमा पुग्नासाथ मिन आङ ह्लाइङले भारत, चीन, लाओस, थाइल्यान्ड, कजाकिस्तान, बेलारुस र रसिया भ्रमण गरेका छन्। ती भ्रमणहरूमा उनले सम्बन्धित देशका नेताहरूसँग भेट गरि व्यापारिक प्यानल मार्फत विदेशी लगानी भित्र्याउन प्रयास गरेका थिए। आलोचकहरूले भने यी कूटनीतिक गतिविधिहरू सैन्य शासनको पकड बलियो बनाउनका लागि गरिएको बताएका छन्।
भियतनाम र म्यान्माबीच रक्षा र सञ्चार क्षेत्रमा लामो समयदेखि सहकार्य भए पनि व्यापार कम भएको छ। सन् २०२० मा ८५ करोड ३० लाख डलर रहेको द्विपक्षीय व्यापार सन् २०२५ मा ५९ करोड डलरमा घटेको थियो। सन् २०२६ को पहिलो छ महिनामा व्यापार ३३ करोड ५० लाख डलर पुगेको छ। हनोईमा मिन आङ ह्लाइङले राष्ट्रपति टो लामसहित वरिष्ठ अधिकारीहरूसँग भेटवार्ता गर्ने साथै व्यापार मञ्चमा सहभागी हुने अपेक्षा गरिएको छ।
भियतनाम भ्रमण उनका लागि आसियान सदस्य राष्ट्रहरूमा तेस्रो हो। फेब्रुअरी २०२१ मा सेनाले आङ सान सुकीको निर्वाचित सरकार अपदस्थ गरेपछि म्यान्मा र आसियानबीच सम्बन्ध बिग्रिएको थियो। आसियानले शान्ति योजना कार्यान्वयनमा प्रगति नभएको भन्दै मिन आङ ह्लाइङलाई उच्चस्तरीय बैठकमा सहभागी हुन रोक लगाएको छ। पश्चिमी मुलुकहरूले पनि उनी र उनका सहयोगीहरूमा प्रतिबन्ध लगाएका छन्। मिन आङ ह्लाइङको पछिल्लो कूटनीतिक सक्रियता म्यान्मालाई क्षेत्रीय संरचनामा पुनः स्थापित गर्ने र आर्थिक सहकार्य विस्तार गर्ने प्रयासको रूपमा लिइएको छ। यसैबीच सन् २०२१ को सैनिक दमनपछि म्यान्मामा राष्ट्रव्यापी सशस्त्र प्रतिरोध र गृहयुद्ध जारी छ।
सम्बन्धित खबर
