समाचार सारांश सम्पादकीय परीक्षणपछि तयार। एमाले अध्यक्ष केपी शर्मा ओलीलाई शनिबार बिहान पक्राउ गरी त्रिवि शिक्षण अस्पतालमा उपचारका लागि भर्ना गरियो। ओलीको मुटु र मिर्गौला रोग विशेषज्ञ टोलीले निगरानीमा राखेर उपचार गरिरहेका छन् र विभिन्न परीक्षणहरू भइरहेको छ। संक्रमणको जोखिमका कारण अस्पतालको क्याबिनमा राखेर उपचार भइरहेको चिकित्सकले जानकारी दिए। १४ चैत, काठमाडौं।
एमाले अध्यक्ष केपी शर्मा ओली हाल त्रिवि शिक्षण अस्पताल (टिचिङ अस्पताल) मा उपचाराधीन छन्। शनिबार बिहान प्रहरीले उनलाई स्वास्थ्य परीक्षणका लागि पक्राउ गरी अस्पताल ल्याएको थियो। आकस्मिक कक्षमा प्रारम्भिक केही परीक्षण पछि चिकित्सकको सल्लाह अनुसार अस्पताल भर्ना गरिएको हो। ओली हाल ‘एनेक्स वान’ भवनको ५०१ नम्बर बेडमा उपचाररत छन् र थप स्वास्थ्य परीक्षण भइरहेको छ।
उपचारमा संलग्न एक चिकित्सकका अनुसार ओलीको स्वास्थ्य अवस्थाको लागि विभिन्न शारीरिक परीक्षणहरू भइरहेका छन्। मिर्गौला र मुटु रोग विशेषज्ञ टोलीले उनलाई निगरानीमा राखेर उपचार गरिरहेका छन्। ती चिकित्सकले भने, ‘बिहान अस्पतालमा आउँदा उहाँको मुटुको गति बढेको थियो र पेटमा पनि दुखाइ रहेको सुनेका थियौं।’ एक्सरे गर्दा पेटमा ढुंगा रहेको खुलेको छ, जसले पेट दुख्नुको कारण हुनसक्ने भनिएको छ। अहिले पेट रोग विशेषज्ञहरूले पनि अवस्थाको निरीक्षण गरिरहेका छन्।
मुटुको अवस्था बुझ्न ‘इको’ परीक्षण गरिएको छ भने मिर्गौलासम्बन्धी परीक्षणहरू पनि भइरहेको छ। ओलीले दुई पटक मिर्गौला प्रत्यारोपण गराइसकेका छन् र नियमित रूपमा प्रत्यारोपणपछिको औषधि (इम्युनोसप्रेसिभ) सेवन गरिरहेका छन्। मुटु एन्जियोप्लास्टिक गरेको इतिहासका कारण उनले औषधि, एन्टिबायोटिक तथा थाइरोइडको औषधि समेत लिइरहेका छन्। संक्रमण जोखिम उच्च भएकाले अस्पतालको क्याबिनमा राखेर चिकित्सकहरूले निगरानीसहित उपचार गरिरहेका छन्। चिकित्सक भन्छन्, ‘अहिले मुटु र मिर्गौलाको थप परीक्षण गरिरहेका छौँ। सबै रिपोर्ट आएपछि मात्र डिस्चार्ज गर्ने वा थप उपचार गर्ने निर्णय गर्न सकिन्छ।’
जेनजी आन्दोलनमा दमन गरेको आरोपमा प्रहरीले पूर्वप्रधानमन्त्री ओलीलाई शनिबार बिहान गुण्डु निवासबाट पक्राउ गरेको थियो। तत्कालीन गृहमन्त्री रमेश लेखक पनि आजै पक्राउ परेका छन्। शनिबार सार्वजनिक बिदा भएकाले उनीहरूलाई आइतबार मात्र अदालतमा पेश गर्ने तयारी रहेको छ।
