२१ भदौ, काठमाडौं । इरानको सनन्दज–हमदान हाइवेमा एउटा इन्धन ट्यांकरमा आगलागी भएको छ। उक्त दुर्घटनामा ११ जनाको मृत्यु भएको छ भने अन्य सात जना घाइते भएका छन्। समाचार एजेन्सी आईआरएनएका अनुसार यो घटना शनिबार साँझ करिब ५:३० बजे सनन्दज सहरको प्रवेशद्वार नजिकै भएको हो। २० हजार लिटर ग्यासोलिन बोकेको इन्धन ट्यांकरले पछाडिबाट एउटा मिनी बसलाई ठक्कर दिएको थियो। ठक्करसँगै भएको विस्फोटमा दुवै सवारी साधनका चालकको मृत्यु भएको छ। घटनापछि कुर्दिस्तानका गभर्नरले सम्पूर्ण प्रान्तमा दुई दिनको सार्वजनिक शोकको घोषणा गरेका छन्। कुर्दिस्तानका मुख्य न्यायाधीश मोहम्मद जब्बारीका अनुसार घटनाको कारणबारे अनुसन्धान गर्न मुद्दा दर्ता गरिएको छ। उनीहरूले प्राविधिक खराबीका कारण इन्धन ट्यांकरको ब्रेकमा समस्या देखिएको प्रारम्भिक अनुसन्धानले देखाएको बताएका छन्।
