नास–आईटीको चौथो साधारणसभाले आगामी तीन वर्षका लागि नौ जना बोर्ड सदस्यहरू निर्वाचित गरेको छ। सन् २०२६–२०९२ का लागि गार्डसिक्स नेपालका कन्ट्री डाइरेक्टर दीपेन चापागाईं अध्यक्ष चयन भएका छन्। नयाँ कार्यसमितिले सदस्य कम्पनी, सरकार, शैक्षिक क्षेत्र, विकास साझेदार र अन्तर्राष्ट्रिय सरोकारवालासँग सहकार्यलाई सुदृढ बनाउने जनाएको छ। २५ भदौ, काठमाडौं।
नेपाल एसोसिएसन फर सफ्टवेयर एन्ड आईटी सर्भिसेस कम्पनीज (नास-आईटी)को चौथो वार्षिक साधारणसभा सम्पन्न भएको छ। सो सभाबाट आगामी तीन वर्षका लागि नौ जना बोर्ड सदस्यहरू निर्वाचित भएका छन्। सन् २०२६–२०२९ का लागि नवनिर्वाचित बोर्डमा गार्डसिक्स नेपालका कन्ट्री डाइरेक्टर दीपेन चापागाईं अध्यक्ष चयन भएका छन्। त्यसैगरी, योङ इन्नोभेसन्सका कार्यकारी अध्यक्ष विभूषण बिष्ट उपाध्यक्ष, अलाया नेपालकी जेनेरल मेनेजर श्रेया श्रेष्ठ महासचिव, जेस्पर आईटीका सीईओ सागर केसी कोषाध्यक्ष चयन भएका छन्।
त्यस बाहेक पाँच जना बोर्ड सदस्यहरू रहेका छन्। लिपफ्रग टेक्नोलोजीका प्रमुख सञ्चालन अधिकृत कैलाश राज विजयानन्द, एमिनेन्स वेजका प्रबन्ध निर्देशक नारायण कोइराला, क्विकफक्स कन्सल्टिङका सीईओ पल्लव पराजुली, बीआईसी टेक्नोलोजीकी सह-संस्थापक प्रार्थना साख: र रिप्पलबाइट्स सोलुसन्सका सह-संस्थापक सुब्रत ज्ञवालीले कार्यसमति सदस्यको रूपमा काम गर्नेछन्। नवनिर्वाचित पदाधिकारी तथा बोर्डले नेपालको प्रविधि उद्योगको विकास र विस्तारका लागि संस्थाको दीर्घकालीन दृष्टिकोणलाई निरन्तरता दिने बताएका छन्।
यस्तै नयाँ कार्यसमितिले नास आईटीका आफ्ना सदस्य कम्पनी, सरकार, शैक्षिक क्षेत्र, विकास साझेदार तथा अन्तर्राष्ट्रिय सरोकारवालासँग सहकार्यलाई थप सशक्त बनाउने जनाइएको छ। नास आईटी नेपालका सफ्टवेयर तथा आईटी सेवा कम्पनीहरूको प्रतिनिधित्व गर्ने गैरनाफामूलक उद्योग संगठन हो। यस संस्थाले नीति पैरवी, उद्योग विकास, प्रतिभा तथा जनशक्ति विकास, अन्तर्राष्ट्रिय बजार पहुँच र सहकार्यका क्षेत्रमा काम गर्दै नेपालको प्रविधि पारिस्थितिकी प्रणालीलाई सुदृढ बनाउने लक्ष्य राखेको छ। यसले विदेशमा नेपाली कम्पनीहरूको प्रचारप्रसार गर्न रोड शोहरू पनि आयोजना गर्दै आएको छ।
सम्बन्धित खबर
